Markus 16

₁Go sabbat lei vássán, de Maria Magdalena, Jakoba eadni Maria ja Salome oste njálggahájat vuoidasiid, vai besset mannat vuoidat Jesusa. ₂Árrat iđedis vahku vuosttaš beaivvi go beaivváš badjánii, sii vulge hávddi lusa. ₃Sii árvaledje guhtet guimmiideasetguin: “Gii veahkehivččii min ja fierahivččii geađggi hávddi uksaráiggi ovddas?” ₄Muhto de sii oidne ahte geađgi lei fierahuvvon eret; dat lei hui stuorra geađgi. ₅Go sii ledje mannan hávddi sisa, de sii oidne olgeš bealde čohkkámin nuorra olbmá geas ledje gárvun guhkes vilges biktasat. Sii suorganedje. ₆Muhto nuorra olmmái celkkii: “Allet suorgan. Dii ohcabehtet Jesus nasaretlačča gii lei russiinávlejuvvon. Son lea čuožžilan jábmiid luhtte, ii son leat dás. Gehččet, dá lea sadji gosa son biddjojuvvui. ₇Muhto mannet dal muitalit Peterii ja eará máhttájeddjiide: ‘Son manná din ovdal Galileai. Doppe dii beassabehtet oaidnit su, nugo son ieš celkkii didjiide.’” ₈Go nissonat bohte olggos, de sii báhtaredje hávddi luhtte doarggistemiin ja balus. Sii eai muitalan maidege geasage, danne go sii balle.

₉Go Jesus iđedis vahku vuosttaš beaivvi lei čuožžilan jábmiid luhtte, de son almmustuvai vuos Maria Magdalenai, geas son lei ádján olggos čieža bahás vuoiŋŋa. ₁₀Maria vulggii das ja muitalii dan daidda geat ledje leamaš Jesusiin ja dál moraštedje ja čirro. ₁₁Muhto sii eai jáhkkán, go sii gulle ahte Jesus lei eallimin ja ahte Maria lei oaidnán su. ₁₂Das maŋŋil Jesus almmustuvai eará hámis guoktásii sis, go soai leigga mannamin eret gávpogis. ₁₃Maiddái dát guovttos manaiga muitalit earáide, muhto sii eai jáhkkán sudnuidege.

₁₄Maŋimustá Jesus almmustuvai oktanuppelohkái máhttájeaddjásis go sii ledje boradeamen. Son cuiggodii sin eahpeoskku ja váimmu garasvuođa, go sii eai lean jáhkkán daidda geat ledje oaidnán ahte son lei bajásčuožžilan.

₁₅Son celkkii sidjiide: “Mannet oppa máilbmái ja sárdnidehket evangeliuma buohkaide oppa sivdnádussii. ₁₆Dat gii dasa osku ja gásttašuvvo, bestojuvvo. Gii ii oskko, dat dubmejuvvo. ₁₇Dáid geat oskot, čuvvot dát mearkkat: Mu nammii sii ádjet olggos bahás vuoiŋŋaid, sárdnot ođđa gillii, ₁₈ dohppejit gieđain gearbmašiid, ja jos sii juhket goddi mirkko, de dat ii sin vahágahte. Sii bidjet gieđaid buhcciid ala, ja dat dearvvašmuvvet.”

₁₉Go Hearrá Jesus lei sárdnon sidjiide dán, de son váldojuvvui bajás albmái ja son čohkánii Ipmila olgeš beallái. ₂₀Máhttájeaddjit vulge ja sárdnidedje buot guovlluin. Hearrá lei singuin ja duođaštii sáni mearkkaiguin.