Markus 4

₁De Jesus oahpahii fas jávregáttis. Su birra čoahkkanedje nu ollu olbmot ahte son fertii mannat čohkkát fatnasii. Son čohkkái jávrri alde fatnasis, ja olbmot čužžo gáttis. ₂Son oahpahii sidjiide eatnat áššiid veardádusaiguin. Ná son oahpahii: ₃“Gullet! Gilvi vulggii gilvit. ₄Ja go son lei gilvimin, de muhtun gilvagat gahčče geaidnogurrii, ja lottit bohte ja borre daid. ₅Muhtun gilvagat gahčče geađgás eatnamii mas ii lean ollu muolda, ja dat ihte johtilit, danin go eanan ii lean assái. ₆Muhto go beaivváš badjánii, de dat bulle ja goldne, danne go dain ii lean ruohtas. ₇Muhtun gilvagat gahčče bastilislánjáid gaskii, ja bastilislánját šadde ja hávkadedje daid, iige šaddu šaddan. ₈Muhto muhtun gilvagat gahčče buori eatnamii. Dat ihte, šadde ja adde šattu, muhtumat golbmalogigeardásaš, muhtumat guhttalogigeardásaš, muhtumatgis čuođigeardásaš šattu.” ₉Ja son celkkii: “Geas leat bealjit, dat gullos!”

₁₀Go Jesus de lei báhcán okto dainna guoktenuppelohkásiin ja daiguin earáiguin geat ledje das, de sii jerre sus veardádusaid mearkkašumi. ₁₁Son celkkii sidjiide: “Didjiide lea oskkilduvvon Ipmila riikka čiegusvuohta, muhto dat geat leat olggobealde, gullet visot dušše veardádussan, ₁₂vai sii oainnedettiinge eai oainnáše eaige fuobmáše, vai sii guladettiinge eai gulaše eaige áddeše, eai jorgalivčče eaige oččoše ándagassii.”

₁₃De Jesus celkkii sidjiide: “Jos dii ehpet ipmir dán veardádusa, mo dalle sáhttibehtet ipmirdit eará veardádusaid? ₁₄Dat maid gilvi gilvá, lea sátni. ₁₅Gilvva mii lea gilvojuvvon geaidnogurrii, lea olbmot geat gullet sáni, muhto dalán go dat lea sidjiide gilvojuvvon, de boahtá Sáhtán váldit dan eret. ₁₆Dat geat ožžot gilvagiid geađgás eatnamii leat dat geat váldet vuostá sáni iluin go gullet dan, ₁₇muhto sii bissot dušše muhtun áiggi, danin go sis eai leat ruohttasat. Go boahtá áŧestus ja doarrádallojupmi sáni dihte, de sii vearránit dallánaga. ₁₈De lea gilvva mii gilvojuvvui bastilislánjáid seahká. Dat lea dat geat gullet sáni, ₁₉muhto dán máilmmi morrašat, riggodaga fillehus ja eará anistumit bohtet ja hávkadit sáni, iige dat atte šattu. ₂₀Muhto gilvva mii lea gilvojuvvon buori eatnamii, lea olbmot geat gullet sáni, váldet dan vuostá ja addet šattu golbmalogigeardásaččat, guhttalogigeardásaččat dahje čuođigeardásaččat.”

₂₁Jesus celkkii: “Buktojuvvogo lámpá latnjii vai dat biddjojuvvo gári dahje seaŋgga vuollái? Almma dat biddjojuvvo lámpájuolgái? ₂₂Ii mihkkege leat čihkkojuvvon muđui go ahte dat boahtá oidnosii, ii leat mihkkege suollemasaid mii ii dahkkojuvvoše almmusin. ₂₃Geas leat bealjit, dat gullos!”

₂₄Ja son celkkii sidjiide: “Váldet vuhtii maid gullabehtet. Nugo dii mihtidehpet, nu didjiidegis mihtiduvvo, ja velá eambboge. ₂₅Geas lea, sutnje addojuvvo, muhto geas ii leat, sus váldojuvvo eret vel datge mii sus lea.”

₂₆Jesus celkkii: “Ipmila riika lea dákkár. Olmmái gilvá gilvagiid eatnamii. ₂₇Son oađđá ja lihkká ain ođđa beaivái, gilvagat ihtet ja šaddet iige son dieđe mo. ₂₈Eanan šaddada šattu iešalddis, vuos rási, de gordneoaivvi, de dievas gortniid gordneoivviide. ₂₉Muhto go šaddu lea ollis, de son vuolggaha sirppe, dainna go láddjenáigi lea boahtán.”

₃₀Jesus celkkii vel: “Manin mii veardidivččiimet Ipmila riikka? Makkár veardádusa geavahivččiimet? ₃₁Dat lea dego sennetsiepman mii lea uhcimus buot máilmmi siepmaniin, ₃₂muhto go dat lea gilvojuvvon, de dat bohciida eatnamis ja šaddá stuoribun go buot eará gilvvašattut. Dat šaddada nu stuorra ovssiid ahte almmi lottit sáhttet dahkat beasi dan suoivanii.” ₃₃Eatnat dákkár veardádusaiguin son sártnui sidjiide sáni, dađe mielde go sii vedje ipmirdit. ₃₄Almmá veardádusaid haga son ii sárdnon sidjiide, muhto go son lei sierranassii máhttájeddjiidisguin, de son čilgii sidjiide buot.

₃₅Go dan seammá beaivvi eahket lei šaddan, de Jesus celkkii máhttájeddjiidasas: “Vulgot don beallái jávrri.” ₃₆Máhttájeaddjit luite olbmuid vuolgit ja manne fatnasii mas Jesus lei juo čohkkámin. Eará fatnasatge čuovvuledje. ₃₇De bođii garra jorribiegga, ja bárut leiko fatnasii nu ahte dat juo devdogođii. ₃₈Muhto Jesus lei fatnasa maŋágeahčen oađđimin guottá vuostá. Máhttájeaddjit bokte su ja dadje: “Oahpaheaddji, itgo don beroš das ahte mii heavvanit?” ₃₉De son morránii, šikkui biekka ja gohčui jávrri: “Jávohuva! Oro jaska!” De váhččii, ja šattai áibbas goalki. ₄₀Jesus celkkii sidjiide: “Manne dii lehpet nu balus? Iigo dis veláge leat osku?” ₄₁Dalle sii balle sakka ja dadje guhtet guoibmáseaset: “Mii olbmáid dát lea? Velá biegga ja jávrige jeagadit su.”