Nehemja 10

Eatnanhearrá Nehemja, Hakalja bárdni, ja Sidkia, ₂Seraja, Asarja, Jeremia, ₃Pašhur, Amarja, Malkia, ₄Hattuš, Šebanja, Malluk, ₅Harim, Meremot, Obadja, ₆Daniel, Ginneton, Baruk, ₇Mešullam, Abia, Mijamin, ₈Maaša, Bilgai, Šemaja. Dát ledje báhpat.

₉Levilaččat: Ješua, Asanja bárdni, Binnui Henadada sogas ja Kadmiel ₁₀ja sin virgeguoimmit Šebanja, Hodia, Kelita, Pelaja, Hanan, ₁₁Mika, Rehob, Hašabja, ₁₂Sakkur, Šerebja, Šebanja, ₁₃Hodia, Bani ja Beninu.

₁₄Álbmoga oaivámuččat: Paroš, Pahat-Moab, Elam, Sattu, Bani, ₁₅Bunni, Asgad, Bebai, ₁₆Adonia, Bigvai, Adin, ₁₇Ater, Hiskia, Assur, ₁₈Hodia, Hašum, Besai, ₁₉Harif, Anatot, Nebai, ₂₀Magpiaš, Mešullam, Hesir, ₂₁Mešesabel, Sadok, Jaddua, ₂₂Pelatja, Hanan, Anaja, ₂₃Hosea, Hananja, Hašub, ₂₄Halloheš, Pilha, Šobek, ₂₅Rehum, Hašabna, Maaseja, ₂₆Ahia, Hanan, Anan, ₂₇Malluk, Harim ja Baana.

₂₈Buot earát – báhpat, levilaččat, uksafávttat, lávlut, tempelbálvaleaddjit ja buohkat geat ledje čuoldán iežaset vieris álbmogiin ja dáhtto vádjolit Ipmila lága mielde, ja maiddái sin áhkát, bártnit ja nieiddat, buohkat geat nagadedje ipmirdit – ₂₉serve lohpádussii maid sin oaivámuččat ledje dahkan ja vurdno doallat Ipmila lága maid Ipmila bálvaleaddji Moses lei addán sidjiide, ja doahttalit dárkilit buot Hearrá, min ráđđejeaddji, báhkkomiid, lágaid ja njuolggadusaid.

₃₀Sii lohpidedje: Mii eat náitte nieiddaideamet vierroálbmogiid olbmáide eatge váldde sin nieiddaid iežamet bártniide áhkkán. ₃₁Go eatnama olbmot buktet gálvvuideaset ja buotlágáš gortniid ja áiggošedje vuovdit daid sabbahin, de mii eat oastte sis maidege, eat sabbahin eatge eará bassebeaivvi. Juohke čihččet jagi mii diktit eatnama vuoiŋŋastit ja mii luoitit buot velggiid. ₃₂Mii lohpidit maid máksit juohke jagi šekelgoalmmádasa Ipmileamet viesu bálvalusa várás, ₃₃oaffarláibbiid, beaivválaš borramušoaffariid, beaivválaš boaldinoaffariid ja sabbatoaffariid várás, mánočalbmebeivviid ja allabasiid oaffariid, bassi attáldagaid ja suddooaffariid várás mat oaffaruššojuvvojit soabahussan Israelii, ja buot min Ipmila viesu bargguid várás.

₃₄Mii, báhpat, levilaččat ja álbmot, leat vuorbádan guđe bearaš ain galgá buktit muoraid Ipmileamet vissui dihto áiggiid juohke jagi, vai Hearrá, min Ipmila, áltára alde sáhttá boaldit dola, nugo láhkii lea čállojuvvon.

₃₅Mii lohpidit buktit juohke jagi Hearrá vissui min eatnama álgošattu ja buotlágán muoraid álgošattu. ₃₆Maiddái min vuosttašriegádeaddji bártniid ja omiid, nugo láhkii lea čállojuvvon, min stuorraomiid ja smávvaomiid vuosttašriegádeddjiid, mii lohpidit buktit Ipmileamet vissui, báhpaide geat bálvalit doppe. ₃₇Vuosttaža das maid mii láibut, ja buotlágán muoraid, viinni ja oljju álgošattuid mii lohpidit buktit báhpaid vuorkálanjaide Ipmileamet vissui. Mii buktit logádasaid min eatnama šattuin levilaččaide geat čogget logádasaid buot min giliin. ₃₈Muhtun báhppa, Arona soga olmmoš, galgá mannat levilaččaid fárrui go sii čogget logádasaid, ja levilaččat galget buktit logádasaid logádasa Ipmileamet vissui, vuorkáviesu gámmáriidda. ₃₉Daidda gámmáriidda israellaččat ja levilaččat galget buktit attáldagaid gortnis, viinnis ja oljjus. Doppe leat bassibáikki lihtit ja bálvaleaddji báhpaid, uksafávttaid ja lávluid biergasat. Mii eat oaččo goaridit Ipmileamet tempela.