4. Mosesgirji 11

₁Álbmot váidalii bahččagit, iige dat lean Hearrá miela mielde. Go Hearrá gulai álbmoga váidalusa, de son moaráhuvai, ja son buolláhii sin gaskii dola ja duššadii siidda ravdda. ₂Dalle álbmot čuorvvui Mosesii. Moses rohkadalai Hearrá, ja dolla játtai. ₃Dat báiki oaččui namman Tabera, dainna go Hearrá dolla lei doppe buolláhan sin.

₄Muhtumat seahkálas veagas mii lei čuvvon israellaččaid, anistuvve sakka borramuššii, ja maiddái israellaččat váidališgohte fas: “Vare mis livččii biergu borrat! ₅Almma muitibehtet mo mii boraimet Egyptas guoli nu ollu go dáhtuimet, ja mis ledje gurkkát, čáhcemelovnnat, boskalávkkit, rukseslávkkit ja vilgeslávkkit! ₆Muhto dál mii vuoimmehuvvat, dáppe ii leat mihkkege. Mii eat oainne maidege eará go manna.” ₇Manna lei nugo koriandersiepmanat ja lei oaidnit dego suovasgáhčči. ₈Álbmot lávii čoaggit dan ja mollet giehtamilluin dahje lihtis. Dasto dat vuššojuvvui ruhkus ja láibojuvvui asehis gáhkkun. Das lei seammá smáhkka go oljjuin láibojuvvon gáhkuin. ₉Manna gahčai idjasuolnni mielde siidii.

₁₀Moses gulai mo olbmot čirro gođiideaset ovddas. Hearrá moaráhuvai sakka, ja maiddái Moses anii dan bahán. ₁₁Son dajai Hearrái: “Manne don meannudat nu bahás muinna, bálvaleddjiinat? Manne don leat munnje nu árpmuheapme ahte leat addán oppa dán álbmoga munnje noađđin? ₁₂Leango mun dán álbmoga eadni, mungo lean dan riegádahttán? Donhan gohčut mu guoddit dan iežan salas nugo njamaheaddji guoddá njammimáná, gitta dan eatnamii maid don vuordnumiin lohpidit min áhčiide. ₁₃Gos mus biergu addit álbmogii, go sii čirrot, áŧestit mu ja dadjet: ‘Atte midjiide bierggu borrat?’ ₁₄Mun in veaje okto guoddit dán álbmoga, dat lea munnje beare lossat. ₁₅Jos don áiggut dahkat ná mu vuostá, de gotte mu baicca dálán. Leage munnje árbmugas alege divtte mu šat oaidnit dán vártnuhisvuođa.”

₁₆Dalle Hearrá sártnui Mosesii: “Čohkke Israela vuorrasiin čiežalogi olbmá geaid dieđát leat árvvus adnojuvvon álbmoga hoavddat, buvtte sin almmustusgoađi lusa ja divtte sin čuožžut das iežat bálddas. ₁₇Mun njiejan dasa sárdnut duinna ja sirddán dus sidjiide oasi dan vuoiŋŋas maid leat ožžon. Nu sii veahkehit du atnit fuola álbmogis, vai don it dárbbaš guoddit okto olles noađi.

₁₈Cealkke álbmogii: Basuhehket iežaideattet ihttážii, de oažžubehtet borrat bierggu. Dii lehpet Hearrá gullut váidalan ja dadjan: ‘Vare mis livččii biergu borrat! Egyptas mis lei buorre dilli!’ Dál Hearrá addá didjiide bierggu borrat. ₁₉Dii ehpet bora dan dušše ovtta dahje guokte beaivvi dahje vihtta dahje logi dahje guoktelogi beaivvi, ₂₀muhto olles mánu, dassážii go dat boahtá olggos din njunneráiggiid ja dan hádja gákkaha váimmu. Ná dáhpáhuvvá dan dihte go dii lehpet hilgon Hearrá guhte lea din gaskkas, ja luoibman: ‘Manne mii galggaimet vuolgit Egyptas!’”

₂₁Moses dajai: “Dán álbmogis man gaskkas mun ásan, leat guhttačuođiduhát olbmá, ja don logat addit sidjiide bierggu nu ollu ahte sii besset borrat dan olles mánu. ₂₂Vaikko mii njuovašeimmet sidjiide buot smávva ja stuorra omiid, de sáhtášiigo dat ollit sidjiide? Dahje vaikko buot ábi guolit bivdojuvvošedje, de sáhtášiigo datge ollit sidjiide?” ₂₃Hearrá vástidii Mosesii: “Leago Hearrái mihkkege veadjemeahttun? Dál don beasat oaidnit ollašuvvágo mu sátni.”

₂₄Moses manai olggos ja muitalii álbmogii maid Hearrá lei cealkán. De son čohkkii álbmoga vuorrasiin čiežalogi olbmá ja doalvvui sin čuožžut goađi birra. ₂₅Hearrá njiejai balvva siste ja sártnui Mosesiin. De son sirddii dan čiežalohkásii oasi dan vuoiŋŋas mii Mosesis lei, ja sii šadde profehtalaš lihkahusaide; muhto maŋŋil nu ii šat dáhpáhuvvan sidjiide.

₂₆Siidii ledje báhcán guokte olbmá; nuppi namma lei Eldad ja nuppigis Medad. Maiddái sudnuide luoitádii vuoigŋa, dasgo soai gulaiga válljejuvvon olbmáid jovkui, vaikko soai eaba leange mannan goahtái, ja soai profehtastalaiga siiddas. ₂₇Muhtun bártnáš viegai muitalit Mosesii: “Eldad ja Medad profehtastallaba siiddas.” ₂₈Josua, Nuna bárdni, gii lei bálvalan Mosesa nuorravuođa rájes, dajai: “Moses, mu hearrá, gieldde sudno!” ₂₉Dalle Moses dajai sutnje: “Leatgo don eddon mu beales? Vare oppa Hearrá álbmot livčče profehtat ja oččošedje Hearrá vuoiŋŋa!” ₃₀De Moses ja Israela vuorrasat máhcce siidii.

₃₁De Hearrá vuolggahii garra biekka mii buvttii meara bealde váktillottiid ja biđgii daid siidii dakkár hivvodaga ahte dat ledje eatnamis guovtti állana assosaš geardin ovtta beaivása veardde juohke beallái siiddas. ₃₂Israellaččat čoaggigohte váktillottiid ja čogge daid geažos beaivvi ja ija ja vel nuppi beaivvige, ja gii lei čoaggán uhcimusat, lei čoaggán logi homermihtu. Sii lebbo lottiid siidda birra goikat.

₃₃Muhto go biergu lei ain sin bániid gaskkas ja sii ledje suoskamin dan, de cahkiidii Hearrá moarri álbmoga vuostá, ja son časkkii sin garrasit, nu ahte máŋgasat jápme. ₃₄Dat báiki gohčoduvvui Kibrot Hattaavan, dasgo dohko hávdáduvvojedje álbmogis dat geat ledje leamaš anistuhkkásat.

₃₅ Kibrot Hattaavas álbmot sirdái Haserotii ja orui doppe muhtun áiggi.