4. Mosesgirji 31

₁Hearrá sártnui Mosesii:

₂Mávssat israellaččaid beales midjanlaččaide. De don váldojuvvot olbmuidat lusa.

₃Moses sártnui álbmogii:

Ráhkkanahttet muhtin olbmáideattet soahtái. Sii galget vuolgit Midjana vuostá mávssahit Hearrá beales. ₄Vuolggahehket soahtái duhát olbmá guđege Israela čearddas.

₅De válljejuvvojedje duhát olbmá guđege Israela čearddas, oktiibuot guoktenuppelohkáiduhát olbmá geat nagodedje soahtat. ₆Moses vuolggahii sin soahtái, duhát olbmá guđege čearddas, ja ovttas singuin Pinehasa, báhppa Elasara bártni, gean hálddus ledje bassi biergasat ja mearkadorvvet. ₇Sii vulge soahtat Midjaniin dan gohččuma mielde maid Hearrá lei addán Mosesii, ja sii godde buot olbmábeale. ₈Goddojuvvon olbmáid gaskkas ledje maiddái Midjana vihtta gonagasa, Evi, Rekem, Sur, Hur ja Reba. Israellaččat godde mihkiin maiddái Bileama, Beora bártni. ₉Sii válde fáŋgan midjanlaččaid nissoniid ja mánáid ja válde sálašin buot fievroomiid, šibihiid ja opmodaga. ₁₀Sii bolde buot midjanlaččaid ássanbáikkiid ja siiddaid. ₁₁Sii válde mielddiset buot sállaša ja buot olbmuid ja šibihiid maid ledje rievidan, ₁₂ja bukte daid Mosesa, báhppa Elasara ja israellaččaid searvegotti siidii Moaba duolbadasaide Jordangáddái Jeriko buohta.

₁₃Moses, báhppa Elasar ja buot searvegotti oaivámuččat vulge sin ovddal siidda olggobeallái. ₁₄Moses moaráhuvai soahteveagaoaivámuččaide geat ledje biddjojuvvon jođihit duháhaoaivámuččaid ja čuohtásaoaivámuččaid, go sii máhcce soađis. ₁₅Son dajai sidjiide: “Lehpetgo diktán buot nissoniid eallit? ₁₆Siihan ledje dat geat Bileama neavvagiid mielde fillejedje israellaččaid oskkáldasmeahttunvuhtii Hearrá vuostá Peora áššis, nu ahte giksi deaividii Hearrá searvegotti. ₁₇Goddet dal buot bártniid ja maiddái buot nissoniid geat leat veallán olbmáin. ₁₈Muhto buot nieiddaid geat eai leat veallán olbmáin, dii oažžubehtet váldit alcceseattet. ₁₉Dii ieža galgabehtet orrut siidda olggobealde čieža beaivvi. Juohkehaš gii lea goddán soapmása dahje guoskan goddojuvvon olbmui, galgá buhtistit iežas goalmmát ja čihččet beaivvi; dát guoská didjiide ja din fáŋggaide. ₂₀Dii galgabehtet maid buhtistit buot biktasiid, buot mii lea duddjojuvvon náhkis dahje gáiccaguolggain, ja buot muorradiŋggaid.”

₂₁Báhppa Elasar dajai soahteolbmáide geat ledje leamaš soađis: “Dát lea mearrádus maid Hearrá lea addán Mosesii: ₂₂Dii galgabehtet bidjat dola čađa golli, silbba, veaikki, ruovddi, dani ja laju, ₂₃buot mii gierdá dola. Dalle dat šaddá buhtisin. Dan galgá vel buhtistit buhtistančáziin. Buot mii ii gierdda dola, galgabehtet bassat buhtistančáziin. ₂₄Čihččet beaivvi galgabehtet bassat iežadet biktasiid, ja de šaddabehtet buhtisin ja oažžubehtet boahtit siidii.”

₂₅Hearrá sártnui Mosesii:

₂₆Don, báhppa Elasar ja searvegotti bearašoaivámuččat galgabehtet lohkat soahtesállaša, olbmuid ja elliid. ₂₇Juogat dasto sállaša guovtte sadjái olbmáid geat ledje soađis, ja searvegotti gaskan. ₂₈Divtte olbmáid geat ledje soađis, máksit Hearrái vearrun ovtta juohke vihttačuohtásis, olbmuin ja buot omiin, stuorraomiin, áseniin ja smávvaomiin. ₂₉Váldde dan sin oasis ja atte báhppa Elasarii oaffarattáldahkan Hearrái. ₃₀Eará israellaččaid vearrun galggat váldit ovtta juohke vihttalohkásis, olbmuin ja buot omiin, stuorraomiin, áseniin ja smávvaomiin. Atte daid levilaččaide geat atnet váras Hearrá goađi.

₃₁Moses ja báhppa Elasar dagaiga dan gohččuma mielde maid Hearrá lei addán Mosesii. ₃₂Soahtesálaš mii bázii das maid soahteolbmát ledje váldán, lei guhttačuođičiežalogivihttaduhát smávvaoami, ₃₃čiežalogiguokteduhát stuorraoami, ₃₄guhttalogioktaduhát ásena ₃₅ja oktiibuot golbmalogiguokteduhát olbmo, nieiddat geat eai lean veallán olbmáin.

₃₆Bealli das, dat oassi mii bođii daidda geat ledje leamaš soađis, lei golbmačuođigolbmalogičiežaduhát vihttačuođi smávvaoami, ₃₇dain guhttačuođičiežalogivihtta smávvaoami vearrun Hearrái, ₃₈golbmalogiguhttačuođi stuorraoami, dain čiežalogiguokte vearrun Hearrái, ₃₉golbmalogiduhát vihttačuođi ásena, dain guhttalogiokta vearrun Hearrái ₄₀ja guhttanuppelohkái olbmo, dain golbmalogiguokte vearrun Hearrái. ₄₁Moses attii vearu, Hearrá oaffarattáldaga, báhppa Elasarii nugo Hearrá lei gohččon.

₄₂Nubbi bealli, israellaččaid oassi maid Moses lei sirren soahteolbmáid oasis, ₄₃namalassii searvegotti oassi, lei golbmačuođigolbmalogičiežaduhát vihttačuođi smávvaoami, ₄₄golbmalogiguhttaduhát stuorraoami, ₄₅golbmalogiduhát vihttačuođi ásena ₄₆ja guhttanuppelohkáiduhát olbmo. ₄₇Israellaččaid oasis Moses válddii ovtta vihttalohkásis, olbmuin ja omiin, ja attii levilaččaide geat Hearrá gohččuma mielde atne váras Hearrá goađi.

₄₈Soahtejoavkkuid oaivámuččat, duháhaoaivámuččat ja čuohtásaoaivámuččat bohte Mosesa lusa ₄₉ja dadje sutnje: “Mii, du bálvaleaddjit, leat lohkan soahteolbmáid geaid mii gohččut, iige sis váillo oktage. ₅₀Dan dihte mii buktit oaffarattáldaga Hearrái. Juohkehaš mis addá Hearrá muođuid ovddas heakkas lonástussan gollediŋggaid maid lea váldán, giehtarieggáid, viđjjiid ja suorbmasiid, bealljerieggáid ja čeabetčiŋaid.” ₅₁Moses ja báhppa Elasar válddiiga sis golli, buot golledujiid. ₅₂Gollit maid duháhaoaivámuččat ja čuohtásaoaivámuččat adde Hearrái oaffarin, ledje buohkanassii guhttanuppelohkáiduhát čiežačuođivihttalogi šekela. ₅₃Juohke soahteolmmái anii alddis dan sállaša maid lei váldán. ₅₄Moses ja báhppa Elasar válddiiga golli duháhaoaivámuččain ja čuohtásaoaivámuččain ja doalvvuiga dan almmustusgoahtái, vai Hearrá muittášii israellaččaid.