4. Mosesgirji 32

₁Rubenlaččain ja gadlaččain ledje hui stuorra oapmeealut. Go sii oidne ahte Jasera ja Gileada eatnamat heivejedje bures guohtuneanamin, ₂de sii bohte Mosesa, báhppa Elasara ja searvegotti oaivámuččaid ságaide ja dadje: ₃“Atarot, Dibon, Jaser, Nimra, Hešbon, Elale, Sibma, Nebo ja Meon, ₄dat eatnamat maid Hearrá lea váldán Israela searvegoddái, heivejit guohtuneanamin, ja mis, du bálvaleddjiin, leat ollu oamit.” ₅Sii dadje vel: “Jos mii leat ožžon árpmu du čalmmiin, de divtte min oažžut dáid eatnamiid opmodahkan. Ale doalvvo min Jordana don beallái.”

₆Muhto Moses dajai gadlaččaide ja rubenlaččaide: “Galggašeiddetgo dii oažžut ássat deike, go din vieljat vulget soahtái? ₇Manne dii baldibehtet israellaččaid mannamis dan eatnamii maid Hearrá lea lohpidan Israelii? ₈Seammá láhkái dahke din áhčitge dalle go mun vuolggahin sin Kadeš Barneas geahčadit eatnama. ₉Sii manne Eškolleahkái ja geahčadedje eatnama, muhto sii balde israellaččaid mannamis dan eatnamii maid Hearrá lei lohpidan sidjiide. ₁₀Dalle Hearrá moarri cahkiidii, ja son vuortnui: ₁₁‘Ii oktage dain olbmáin geat vulge Egyptas, guoktelogijahkásaččaid rájes, beasa oaidnit dan eatnama maid mun vuordnumiin lohpidin Abrahamii, Isakii ja Jakobii, dainna go sii eai leat leamaš oskkáldasat munnje. ₁₂Dan oaidniba dušše kenisselaš Kaleb, Jefunne bárdni, ja Josua, Nuna bárdni. Soai leaba leamaš oskkáldasat Hearrái.’ ₁₃Hearrá moarri cahkiidii Israela vuostá, ja son divttii sin vádjolit duohkot deike meahcis njealljelogi jagi, dassážii go lei jápmán oppa dat buolva mii lei dahkan dan mii lei bahá Hearrá čalmmiin. ₁₄Dál dii suttolaččaid nálli lehpet čuožžilan áhčiideattet sadjái ja lasihehpet Hearrá moari Israela vuostá. ₁₅Jos dii dál jorgalehpet eret Hearrás, de son diktá dán álbmoga orrut ain guhkit meahcis, ja dii dagahehpet heavu oppa dán álbmogii.”

₁₆Sii lahkonedje Mosesii ja dadje: “Mii dáhttut dušše hukset oapmegárddiid ealuidasamet ja gávpogiid iežamet áhkáid ja mánáid várás. ₁₇Muhto mii ieža ráhkkanit soahtat israellaččaid njunnošis, dassážii go leat dolvon earáid sin iežaset ássansajiide. Dan botta min áhkát ja mánát ásset ladnegávpogiin, ráfis dan eatnama ássiin. ₁₈Mii eat máhca ovdal go buot israellaččat leat ožžon opmodagaset. ₁₉Mii eat siđa opmodaga earrásiid gaskkas don bealde Jordana, go mii leat ožžon iežamet opmodaga dáppe Jordana nuorttabealde.”

₂₀Moses vástidii: “Jos dii dahkabehtet nugo lohpidehpet, jos ráhkkanehpet Hearrá soahtái ₂₁ja jos buot din soahteolbmát mannet Jordana rastá ja sohtet dassážii go Hearrá lea ádján vašálaččaidis eret ₂₂ehpetge máhca ovdal go eanan lea váldojuvvon Hearrái, de dii lehpet vigiheamit Hearrá ja Israela ovddas, ja Hearrá addá dán eatnama din opmodahkan. ₂₃Muhto jos dii ehpet daga nu, de dii suddudehpet Hearrá vuostá, ja dalle oažžubehtet diehtit ahte suddu deaivida din. ₂₄Huksejehket gávpogiid iežadet áhkáide ja mánáide ja gárddiid smávvaomiidasadet, muhto dahket maiddái dan maid lohpideiddet.”

₂₅Gada ja Rubena olbmát dadje Mosesii: “Mii, du bálvaleaddjit, dahkat nugo don gohčut, hearrá. ₂₆Min mánát ja áhkát, min oamit ja buot min bargošibihat báhcet deike Gileada gávpogiidda, ₂₇muhto buot min olbmát geat nagodit soahtat, ráhkkanit vuolgit Hearrá soahtái Jordana nuppe beallái, nugo don, min hearrá, gohččot.”

₂₈Dalle Moses attii sidjiide gustovaš mearrádusa báhppa Elasarii ja Josuai, Nuna bárdnái, ja Israela čearddaid bearašoaivámuččaide. ₂₉Son celkkii sidjiide: “Jos buot Gada ja Rubena olbmát geat leat vearjuduvvon soahtat Hearrá muođuid ovddas, vulget dinguin Jordana nuppe beallái ja dii váldibehtet dan eatnama, de galgabehtet addit Gileada sin opmodahkan. ₃₀Muhto jos sii eai vuolgge dinguin soahtat Kanaanii, de sii ožžot opmodaga din gaskkas Kanaanis.”

₃₁Dalle Gada ja Rubena olbmát vástidedje: “Mii dahkat nugo Hearrá lea gohččon. ₃₂Mii ráhkkanit ja vuolgit Hearrá soahtái Kanaanii. De mii oažžut alcceseamet opmodaga dán bealde Jordana.”

₃₃De Moses attii gadlaččaide ja rubenlaččaide ja Josefa bártni Manasse čeardabeallái amorlaččaid gonagasa Sihona ja Bašana gonagasa Oga riikkaid oktan daid gávpogiiguin ja gávpogiid biraseatnamiiguin. ₃₄Gadlaččat huksejedje Dibona, Atarota, Aroera, ₃₅Atrot-Šofana, Jasera, Jogbeha, ₃₆Bet-Nimra ja Bet-Harana, nu ahte sii ožžo ladnegávpogiid ja oapmegárddiid. ₃₇Rubenlaččat huksejedje Hešbona, Elale ja Kirjataima, ₃₈ja maiddái Nebo ja Baal-Meona – dain ledje maid eará namat – ja Sibma. Dás namahuvvon namat biddjojuvvojedje gávpogiidda mat huksejuvvojedje ođđasis. ₃₉Manasse bártni Makira nálli manai Gileadii, válddii eatnama ja ájii doppe eret amorlaččaid. ₄₀Moses attii Manasse bártni Makira sohkii Gileada, ja dat ásai dohko. ₄₁Manasse bártni Jaira nálli manai Hama siiddaide, válddii daid ja gohčodii daid Jaira siidan. ₄₂Nobah manai Kenatii ja dan birasgávpogiidda ja válddii daid. Son gohčui báikki Nobahin iežas nama mielde.