4. Mosesgirji 35

₁Hearrá sártnui Mosesii Moaba duolbadasain Jordangáttis Jeriko buohta:

₂Gohčo israellaččaid earuhit opmodagasteaset gávpogiid maidda levilaččat ožžot ássat. Dii galgabehtet maiddái addit levilaččaide guohtuneatnamiid gávpogiid birra. ₃Dát gávpogat leat sin ássanbáikkit, ja guohtuneatnamat leat sin omiid ja buot sin eará šibihiid várás. ₄Guohtuneatnamat maid dii addibehtet levilaččaide, galget ollit duhát állana juohke guvlui gávpotmuvrras. ₅Guohtuneatnama guđege ravdda guhkkodat gávpoga birra galgá leat guokteduhát állana nuortta, luli, oarjji ja davi bealde, ja gávpot lea dan gasku. Dákkár guohtuneatnamiid levilaččat galget oažžut gávpogiiddiset birra.

₆Daidda gávpogiidda maid dii earuhehpet levilaččaide, gullet guhtta dorvogávpoga maidda olmmošgoddit sáhttet báhtarit. Daidda lassin galgabehtet addit sidjiide vel njealljelogiguokte eará gávpoga. ₇Dii galgabehtet addit levilaččaide oktiibuot njealljelogigávcci gávpoga ja daid guohtuneatnamiid. ₈Go dii váldibehtet daid gávpogiid israellaččaid opmodagas, de galgabehtet váldit ollu stuorra čearddain ja unnán smávva čearddain. Juohke čearda galgá addit levilaččaide gávpogiid dan eatnama sturrodaga mielde maid čearda lea ožžon opmodahkanis.

₉Hearrá sártnui Mosesii:

₁₀Cealkke israellaččaide: Go dii mannabehtet Jordana rastá Kanaanii, ₁₁de galgabehtet válljet alcceseattet muhtun dorvogávpogiid, vai juohkehaš gii lea goddán olbmo áiccakeahttáivuođas, beassá báhtarit. ₁₂Dát gávpogat leat didjiide dorvobáikkit maidda varramávssaheaddji ii beasa, iige olmmošgoddi oaččo goddojuvvot jos son ii leat almmolaččat dutkojuvvon ja dubmejuvvon. ₁₃Galgabehtet earuhit dorvogávpogin guhtta iežadet gávpogiin. ₁₄Dain golbma galget earuhuvvot Jordana nuorttabealde ja golbma maid Kanaanis. ₁₅Sihke israellaččaide ja vierrásiidda ja mátkkálaččaide geat orrot álbmoga gaskkas, dát guhtta gávpoga leat dorvobáikkit. Daidda sáhttá báhtarit juohkehaš gii lea goddán olbmo vahágis.

₁₆Muhto jos muhtin časká ruovdeneavvuin nuppi jámas, de son lea sorbmejeaddji ja galgá ráŋggáštuvvot jápmimiin. ₁₇Jos muhtin časká nuppi nu stuorra geđggiin ahte dainna sáhttá časkit jámas, ja nubbi jápmá, de dat gii časkkii, lea sorbmejeaddji, ja son galgá ráŋggáštuvvot jápmimiin. ₁₈Jos muhtin časká nuppi muorain mii sáhttá adnojuvvot goddinvearjun, ja nubbi jápmá, de son lea sorbmejeaddji ja galgá ráŋggáštuvvot jápmimiin. ₁₉Varramávssaheaddji galgá goddit sorbmejeaddji dalán go fáhte su. ₂₀Jos muhtin norddasta nuppi bahás áigumušain dahje bahádáhtolaččat bálkesta su njeaiga juoidá nu ahte son jápmá, ₂₁dahje čorbmada nuppi vašis nu ahte son jápmá, de son galgá ráŋggáštuvvot jápmimiin, danin go son lea sorbmejeaddji. Varramávssaheaddji oažžu goddit sorbmejeaddji dalán go fáhte su.

₂₂Muhto jos muhtin áiccakeahttáivuođas norddasta nuppi olbmo geainna ii lean riidalan, dahje bálkesta su njeaiga juoga diŋgga almmá bahás áigumuša haga, ₂₃dahje oainnekeahttá deaivá nubbái dakkár geđggiin mainna sáhttá goddit, nu ahte nubbi jápmá, ja vaikko son ii lean dan nuppi vašálaš iige dáhtton sutnje maidege baháid, ₂₄de dalle searvegoddi galgá dubmet olmmošgoddi ja varramávssaheaddji gaskka dáid mearrádusaid mielde. ₂₅Searvegoddi galgá gádjut olmmošgoddi varramávssaheaddji gieđas ja doalvut su ruoktot dorvogávpogii masa son lei báhtaran. Doppe son galgá orrut dassážii go bajimusbáhppa gii lea vuidojuvvon bassi oljjuin, jápmá. ₂₆Jos olmmošgoddi manná olggobeallái dan dorvogávpoga rájá masa lea báhtaran, ₂₇ja varramávssaheaddji fáhte su doppe, de varramávssaheaddji oažžu goddit olmmošgoddi iige šatta sivalažžan su varrii. ₂₈Olmmošgoddi ferte orrut dorvogávpogis dassážii go bajimusbáhppa jápmá. Easka bajimusbáhpa jápmima maŋŋil son oažžu máhccat ruktosis. ₂₉Dát láhka galgá gustot didjiide buolvvas bulvii, gos dal ásažehpetge.

₃₀Jos muhtin goddá nuppi olbmo, de sorbmejeaddji oažžu goddojuvvot dušše duođašteddjiid duođaštusaid vuođul. Muhto ovtta duođašteaddji duođaštusa vuođul ii oaččo geange dubmet jápmimii.

₃₁Jos muhtin lea sorbmen nuppi ja nu ánssášan jápminduomu, de ehpet oaččo váldit ruđa mii fállojuvvo lonástussan sorbmejeaddji heakka gádjuma várás; son galgá ráŋggáštuvvot jápmimiin. ₃₂Allet suova lonistanruđa vuostáge sorbmejeaddji gii lea báhtaran dorvogávpogii, máhccat ruoktot ovdal go bajimusbáhppa lea jápmán.

₃₃Allet eahpebasut eatnama gos ássabehtet. Varra eahpebasuha eatnama, ja eatnama masa varra lea golggahuvvon sáhttá buhtistit varravealggis dušše dan varain gii vara lei golggahan. ₃₄Allet daga buhtismeahttumin eatnama gos ássabehtet, ja gos maiddái mun, Hearrá, ásan din gaskkas.