4. Mosesgirji 8

₁Hearrá sártnui Mosesii:

₂Cealkke Aronii: “Go don bijat sadjáseaset dan čieža lámppá, de geahča bearrái ahte daid čuovga báitá njuolga lámpájuolggi ovdii.”

₃Aron dagai nu. Son bijai lámppáid sadjáseaset, nu ahte daid čuovga báittii lámpájuolggi ovdii dan gohččuma mielde maid Hearrá lei addán Mosesii. ₄Lámpájuolgi lei duddjojuvvon gollis ja dan juolgi ja lieđđelasttat ledje derpojuvvon oktan bihttán. Dat lei duddjojuvvon aiddo dakkáražžan go Hearrá lei čájehan Mosesii.

₅Hearrá sártnui Mosesii:

₆Čuoldde levilaččaid eará israellaččain ja buhtis sin. ₇Ná don galggat meannudit go buhtistat sin: Riškkut sin ala buhtistančázi, ja sii galget ráhket guolggaid oppa rupmašis ja bassat biktasiiddiset. Ná sii buhtistuvvojit. ₈Sii galget váldit nuorra vuovssá ja borramušoaffara mii dasa gullá ja mii lea ráhkaduvvon sevlejuvvon jáffuin ja oljjuin seaguhuvvon dáiggis. Galggat váldit eará nuorra vuovssá suddooaffarin. ₉Buvtte levilaččaid almmustusgoađi ovdii ja rávkka čoahkkái oppa Israela searvegotti. ₁₀Buvtte dasto levilaččaid Hearrá ovdii ja divtte israellaččaid bidjat gieđaid sin ala. ₁₁Aron galgá Hearrá muođuid ovddas basuhit levilaččaid bajidanoaffarin israellaččaid beales, ja ná sii leat vihahuvvon bálvalit Hearrá. ₁₂Levilaččat galget bidjat gieđaid vuovssáid oaivvi ala, ja don galggat oaffaruššat nuppi vuovssá suddooaffarin ja nuppigis boaldinoaffarin Hearrái levilaččaid suttuid soabahussan. ₁₃Bija levilaččaid bálvalit Arona ja su bártniid ja basut sin bajidanoaffarin Hearrái.

₁₄Ná don galggat čuoldit levilaččaid eará israellaččain, nu ahte sii šaddet mu opmodahkan. ₁₅Das maŋŋil sii besset bálvalit almmustusgoađis. Don galggat buhtistit sin ja basuhit sin bajidanoaffarin, ₁₆dasgo sii leat čuldojuvvon munnje. Mun lean čuoldán sin alccesan buot daid sadjái geat rahpet eatnigoaŧu, buot israellaččaid vuosttašriegádeddjiid sadjái. ₁₇Buot israellaččaid vuosttašriegádeaddjit gullet munnje, sihke olbmuid ja omiid. Dan beaivvi go mun godden buot egyptalaččaid vuosttašriegádeddjiid, de mun basuhin israellaččaid vuosttašriegádeddjiid alccesan. ₁₈Dál mun válddán levilaččaid alccesan buot israellaččaid vuosttašriegádeddjiid sadjái. ₁₉Mun lean čuoldán sin eará israellaččain ja addán sin Aronii ja su bártniide, vai sii dahket israellaččaid bálvalusdoaimmaid almmustusgoađis ja ná doaimmahit sidjiide soabahusa. Dalle lihkuhisvuohta ii deaivit israellaččaid, go sii lahkanit bassibáikái.

₂₀Moses, Aron ja oppa Israela searvegoddi dahke levilaččaide aiddo dan gohččuma mielde maid Hearrá lei addán Mosesii. ₂₁Levilaččat buhtistedje iežaideaset ja basse biktasiiddiset, ja Aron basuhii sin bajidanoaffarin Hearrái ja doaimmahii sidjiide soabahusa sin suttuin, nu ahte sii buhtásmuvve. ₂₂Das maŋŋil levilaččat doaimmahišgohte bálvalusa almmustusgoađis Arona ja su bártniid geahčus. Ná devdojuvvui gohččun maid Hearrá lei addán Mosesii.

₂₃Hearrá sártnui Mosesii:

₂₄Dát mearrádus gusto levilaččaide: Guoktelogiviđajahkásažžan sii leat geatnegasat dahkagoahtit bargobálvalusa almmustusgoađis, ₂₅muhto go sii devdet vihttalogi jagi, de sii luitojuvvojit bargogeatnegasvuođas eaige oaččo šat bálvalit. ₂₆Sii ožžot ain veahkehit vieljaideaset almmustusgoađi doaimmain, muhto sii eai oaččo dahkat bálvalusdoaimmaid. Ná don galggat ordnet levilaččaid bálvalusdoaimmaid.