4. Mosesgirji 9

₁Nuppi jagi maŋŋil go israellaččat ledje vuolgán Egyptas, nuppi jagi vuosttaš mánus, Hearrá sártnui Mosesii Sinaimeahcis:

₂Israellaččat galget doallat beassážiid mearriduvvon áigái. ₃Dii galgabehtet oaffaruššat beassášlábbá eahkedisveaigin jagi vuosttaš mánu njealljenuppelogát beaivvi ja doallat beassážiid buot lágaid ja mearrádusaid mielde.

₄Moses gohčui israellaččaid oaffaruššat beassášoaffara, ₅ja sii oaffarušše dan Sinaimeahcis vuosttaš mánu njealljenuppelogát beaivvi eahkedisveaigin. Israellaččat dahke buot nu go Hearrá lei gohččon Mosesa bokte.

₆Muhtun olbmát ledje šaddan buhtismeahttumin go ledje guoskkahan jábmi, eaige sáhttán oaffaruššat beassášoaffara mearrebeaivvi. Sii bohte Mosesa ja Arona lusa ₇ja jerre: “Mii leat šaddan buhtismeahttumin jábmi dihte. Eatgo mii oaččo buktit oaffarattáldaga Hearrái mearriduvvon áigái oktanaga eará israellaččaiguin?” ₈Moses vástidii: “Vurdet dás, de mun manan gullat maid Hearrá mearrida din áššis.”

₉Hearrá sártnui Mosesii:

₁₀Cealkke israellaččaide: Jos muhtumat dis dahje din nális leat šaddan buhtismeahttumin rupmaša dihte dahje leat guhkes mátkkis, de sii dattetge ožžot doallat beassážiid Hearrá gudnin. ₁₁Sii galget nuppi mánu njealljenuppelogát beaivvi eahkedisveaigin oaffaruššat beassášlábbáset ja borrat dan suvrutkeahtes láibbiin ja rihča urtasiiguin. ₁₂Sii eai oaččo guođđit das maidege iđidii eaige doadjit das ovttage dávtti. Sii galget doallat beassážiid buot mearrádusaid mielde. ₁₃Muhto jos muhtin ii doala beassážiid vaikko lea buhtis iige leat mátkkis, de son galgá jávkaduvvot álbmogisttis, danne go son ii buktán iežas oaffarattáldaga Hearrái mearreáigái. Son galgá guoddit suttus čuovvumušaid. ₁₄Jos muhtun vieris gii ássá din luhtte, dáhttu doallat beassážiid Hearrá gudnin, de son galgá doallat beassážiid buot lágaid ja mearrádusaid mielde. Seammá láhka gusto sihke vierrásii ja eatnamis riegádan olbmui.

₁₅Go goahti mii suddjii lihtuárkka, lei ceggejuvvon, de dan govččai balva, ja eahkedis sevnnjodettiin goađi badjelis oidnui dego dola báitin mii orui das iđida rádjái. ₁₆Nu lei álelassii. Beaivet balva govččai goađi, ja ihkku dan badjelis balva báittii dego dolla. ₁₇Juohke háve go balva badjánii goađi badjelis, de israellaččat vulge johtui, ja sii luoitaledje dohko gosa balva bisánii. ₁₈Israellaččat vulge johtui ja luoitaledje dalle go Hearrá gohčui. Nu guhká go balva orui goađi badjelis, de sii orro siiddas. ₁₉Dallege go balva orui goađi badjelis guhká, de israellaččat jeagadedje Hearrá rávvagiid eaige vuolgán johtui. ₂₀Muhtumin balva lei dušše moadde beaivvi goađi badjelis. Dalle sii orro siiddas nugo Hearrá lei gohččon ja vulge johtui easkka dalle go Hearrá gohčui. ₂₁Muhtumin balva orui das eahkedis iđidii ja de badjánii. Dalle sii vulge johtui dallánaga, nugo maiddái dalle go balva orui das dušše jándora ja de badjánii. ₂₂Go balva orui goađi badjelis moadde beaivvi dahje olles mánu dahje vel guhkit áiggi, de dalle israellaččat orro siiddas eaige vuolgán johtui ovdal go balva badjánii. ₂₃Hearrá gohččuma mielde sii luoitaledje, ja Hearrá gohččuma mielde sii vulge johtui. Sii čuvvo gohččumiid maid Hearrá lei addán sidjiide Mosesa bokte.