Filippi 1

₁Paulus ja Timoteus, Jesus Kristusa bálvaleaddjit, dearvvaheaba buot Kristus Jesusa bassi olbmuid geat ásset Filippis, ja sin gehččiid ja diakonaid.

₂Árbmu didjiide ja ráfi Ipmilis, min Áhčis, ja Hearrá Jesus Kristusis.

₃Mun giittán Ipmilan nu dávjá go muittán din, ₄nu dávjá go rohkadalan din buohkaid ovddas. Rohkadaladettiinan mun lea ilus das ₅go dii lehpet leamaš fárus evangeliuma barggus vuosttaš beaivvi rájes gitta dássážii. ₆Mun lean vissis dasa ahte son guhte álggahii buori dagu din siste, ollašuhttá dan gitta Jesus Kristusa beaivvi rádjái. ₇Mus leat buorit sivat jurddašit ná din buohkaid birra, danne go mun anán din váimmustan, ja leaččan dal láhkkiin dahje bealušteamen ja nannemin evangeliuma, de dii buohkat lehpet oasálaččat seamma árbmui oktanaga muinna. ₈Ipmil lea mu duođašteaddji ahte mun áibbašan oaidnit din buohkaid ja ráhkistan din njuorrasit, nugo Kristus Jesus din ráhkista. ₉Ja mun rohkadalan ahte din ráhkisvuohta lassánivččii dieđu ja ipmárdusa dáfus, ₁₀vai máhttibehtet guorahallat mii lea mávssolaš, ja vai lehpet buhttásat ja láitemeahttumat go vuordibehtet Kristusa beaivvi ₁₁ja buvttadehpet Ipmila gudnin ja rámádussan valjis vanhurskkisvuođa šaddosiid maid duddjo Jesus Kristus.

₁₂Vieljažiiddán, mun dáhtun din diehtit ahte dat mii lea dáhpáhuvvan munnje, leage šaddan evangeliuma ovdáneapmin. ₁₃Buot heaggafávttaide ja earáidenai lea šaddan dovddusin ahte mun lean fáŋgan Kristusa dihte. ₁₄Eanas vieljat dáppe leat Hearrái luohttimiin mu láhkkiid dihte roahkasmuvvan velá duostileabbot sárdnut balakeahttá Hearrá sáni.

₁₅Muhtumat gal sárdnidit Kristusa gáđašvuođas ja nákku dihte, muhto earát buriin dáhtuin. ₁₆Sii sárdnidit ráhkisvuođas, danne go dihtet ahte mun lean biddjojuvvon bealuštit evangeliuma, ₁₇muhto dot sárdnidit Kristusa danin go bivdet bealkku eaige buhtis mielain, ja sii jurddašit lasihit mu áŧestusa fáŋgavuođas. ₁₈Na de dasto! Mun illudan vel dasge ahte Kristus almmatge sárdniduvvo, leaččai dal ulbmil buorre dahje behtolaš.

Muhto mun áiggun ain illudit. ₁₉Mun dieđán ahte buot dát šaddá munnje bestojupmin din rohkadusaid dihte ja dan veahki dihte maid Jesus Kristusa Vuoigŋa addá. ₂₀Ja mus lea dat vuordámuš ja doaivu ahte mun in šatta heahpadii mange áššis, muhto ahte mun dál, nugo álo ovdalge, duosttašin rámidit Kristusa iežan rupmašiin, juogo dat eallá dahje jápmá. ₂₁Dasgo munnje eallin lea Kristus ja jápmin lea vuoitu. ₂₂Muhto jos dat ahte mun beasan ain eallit lea ávkin mu bargui, de in dieđe goappá vállježan. ₂₃Mun geasuhuvvon goappáge beallái: Mun hálidivččen vuolgit dáppe eret ja leat Kristusa luhtte, dasgo dat livččii buoremus. ₂₄Muhto din dihte lea dárbbašlaččat ahte mun ealán, ₂₅dás mun lean vissis, ja mun dieđán ahte mun šattan báhcit ja orrut din buohkaid luhtte vai veahkehivččen din ovdánit ja illudit oskkus. ₂₆Ja mu bokte, go mun boađán fas din lusa, de dii beassabehtet illudit ain eambbo dan dihte go gullabehtet Kristus Jesusii.

₂₇Ellet fal dakkár eallima mii lea dohkálaš Kristusa evangeliuma árvui. Jogo mun dal bođežan din lusa dahje in, de mun sávan beassat gullat ahte dii bissubehtet nanusin seammá vuoiŋŋas ja rahčabehtet ovttamielalažžan evangeliuma ja oskku dihte ₂₈ehpetge goassege divtte vuostálastiid baldit iežadet mange láhkái. Dat lea sidjiide Ipmila addin mearka das ahte sin vuordá heavvaneapmi, muhto din vuordá bestojupmi. ₂₉Didjiide lea addojuvvon dat árbmu ahte oažžubehtet oskut Kristusii ja maiddái su dihte gillát. ₃₀Dis lea seammá soahti maid lehpet oaidnán mu soahtamin ja maid dál gullabehtet mu ain soahtamin.