Filippi 2

₁Jos Kristusa ráhkisvuohta jeđđe ja arvvosmahttá min, jos Vuoiŋŋa searvevuohta čatná min oktii ja jos mii dovdat láđisvuođa ja árkkálmastinvuođa guhtet guimmiideametguin, ₂de dahket mu ilu ollisin ja lehket ovttamielalaččat. Ellet seammá ráhkisvuođas ja seammá miellalágis, ₃allet daga maidege iešbuorrevuođas dahje gudneáŋgirvuođas, muhto atnet vuollegašvuođas earáid alibun go iežadet. ₄Allet háhpohala dušše iežadet ávkki, muhto maiddái earáid ávkki. ₅Lehkos dis seammá miellaláhki mii Kristus Jesusis lei.

₁₂Dan dihte, ráhkkásiiddán, nugo dii lehpet jeagadan mu álo go lean leamaš din luhtte, de jeagadehket sakka eambbo dál go mun orun eret: Barget bestojuvvot baluin ja doarggistemiin. ₁₃Dasgo Ipmil lea dat guhte duddjo din siste vai dii sihke dáhttubehtet ja dahkabehtet dan mii lea su buori dáhtu mielde. ₁₄Dahket buot nimmorkeahttá ja almmá ákkaid haga ₁₅vai šaddabehtet láitemeahttumin ja buhtisin, Ipmila máinnehis mánnán dán gážžáris jorggu buolvva gaskii. Dii báitibehtet dego násttit almmis ₁₆go doallabehtet gitta eallima sánis, ja mun beasan rámádallat Kristusa beaivvi das ahte in leat viehkan ja rahčan duššás. ₁₇Vaikko vel mu varrage golggahuvvošii go mun buvttán din oskku oaffarin Ipmilii, de mun dattetge lean ilus ja ávvudan dinguin buohkaiguin. ₁₈Lehket maiddái dii ilus ja illudehket oktan muinna.

₁₉Hearrá Jesus lea addán munnje dan doaivvu ahte mun fargga beasan vuolggahit Timoteusa din lusa, vai maiddái mun arvvosmuvan go gulan didjiide ságaid. ₂₀Mus ii leat oktage su láhkásaš, ii oktage gii nu vuoiggalaččat anášii dis fuola, ₂₁danin go buohkat bivdet dušše iežaset ávkki eaige dan mii gullá Jesus Kristusii. ₂₂Muhto Timoteusa oskkáldasvuođa dii dovdabehtet: Son lea oktan muinna ovddidan evangeliuma dego bárdni gii bálvala áhčis. ₂₃Mun sávan beassat vuolggahit su din lusa nu fargga go oainnán mo munnje geavvá. ₂₄Ja mun luohtán Hearrái ahte mun ieš fargga beasan boahtit din lusa.

₂₅Dál mun goit šattan vuolggahit din lusa vielljamet Epafroditusa, iežan guoimmi barggus ja soađis. Son lea maid din áirras gii bođii veahkehit dalle go mun dárbbašin veahki. ₂₆Son ohcala din buohkaid ja lea morrašis go dii leiddet gullan ahte son lei buohcamin. ₂₇Buohcamin son maid lei, goasii jápmimin, muhto Ipmil árpmihii su, iige dušše su muhto maiddái mu, aman oažžut ođđa morraša lassin ovddežiidda. ₂₈Dan dihte mun dađe movttegeappot vuolggahan su din lusa, vai beassabehtet illudit go fas oaidnalehpet, ja vai munge livččen uhcit morrašis. ₂₉Váldet su vuostái stuora iluin Hearrá nammii ja gudnejahttet su lágan olbmuid. ₃₀Dasgo Kristusa barggu dihte son goasii jámii. Son bijai iežas heakkavárrii vai beasai addit munnje dan veahki maid dii ehpet sáhttán addit.