Sátneláskkut 11

₁Vearreveavttaid Hearrá fasttáša,

ollesdettot vihkkenlottaide

son liiko.

₂Gos lea čeavli, dohko boahtá heahpat,

vuollegaččaid páras

lea viissisvuohta.

₃Vuoigatlaččaid oahpista

sin vuiges miella,

oskkáldasmeahttumiid duššada

sin behtolašvuohta.

₄Opmodat ii veahket moari beaivvi,

vanhurskkisvuohta gádju jápmimis.

₅Láitemeahttun olbmo

vanhurskkisvuohta

dahká su geainnu dássidin,

ipmilmeahttun duššá iežas bahávuhtii.

₆Vuoigatlaš olbmuid vanhurskkisvuohta

gádju sin,

behtolaččat darvánit iežaset himuide.

₇Go olmmái jápmá,

de su doaivu lea nohkan,

su fápmu ii šat atte doaivvu.

₈Vanhurskkis gáddjojuvvo áŧestusas,

ipmilmeahttun šaddá su sadjái.

₉Ipmilmeahttun vahágahttá

sániidisguin lagamuččas,

diehtu gádju vanhurskásiid.

₁₀Go vuoigatlaččaide geavvá bures,

de gávpot illuda,

go ipmilmeahttumat duššet,

de illu lea stuoris.

₁₁Vuoigatlaččaid buressivdnádusat

huksejit gávpoga,

ipmilmeahttumiid ságat duššadit dan.

₁₂Jierpmeheapme

badjelgeahččá lagamuččas,

jierpmálaš olmmái orru jávohaga.

₁₃Šoambás olmmoš

muitala čiegusvuođaid,

luohtehahtti olmmái čiehká ášši.

₁₄Go ii leat stivrejupmi,

de álbmot jorrala,

ráđđeaddiid eatnatvuohta

addá bestojumi.

₁₅Bahás geavvá dasa

gii dáhkida vierroolbmo,

dat gii biehttala addaleames gieđaid,

lea oadjebas.

₁₆Liekkus nisson oažžu gudni,

viššalis olmmái háhká riggodaga.

₁₇Buorredáhtolaš dahká buori alccesis,

dat gii lea goavvi, vahágahttá iežas.

₁₈Ipmilmeahttun fidne

behtolaš vuoittu,

dat gii gilvá vanhurskkisvuođa,

oažžu bistevaš bálkká.

₁₉Gii bissu vuoigatlažžan,

oažžu eallima.

Bahávuođa váinnuheapmi

doalvu jápmimii.

₂₀Hearrá fasttáša behtolaččaid,

muhto dat geat vádjolit láitemeahttumit,

leat su miela mielde.

₂₁Bahás olmmoš ii beasa goassege

ráŋggáškeahttá,

vanhurskásiid nálli gáddjojuvvo.

₂₂Dego golleriekkis spiinni njunis

lea čáppa nisson geas váilu jierbmi.

₂₃Vanhurskásiid hálidus buktá lihku,

ipmilmeahttumiid doaivu doalvu moarrái.

₂₄Muhtun lea árvvas

ja oažžu ain eambbo,

nubbi hánohallá ja dattetge gefo.

₂₅Árvvas olmmoš oažžu ieš valji,

dat gii galleha iežáid, gallehuvvo ieš.

₂₆Álbmot garuha dan

gii doallá gortni alddis,

dat gean gordni lea vuovdimassii,

buressivdniduvvo.

₂₇Dat gii ohcá buori,

gávdná lihku,

gii ohcá bahá, dasa dat boahtá.

₂₈Dat gii dorvvasta riggodahkasis,

gahččá,

vanhurskásat leat

dego rudnes lasttat.

₂₉Dat gii goarida iežas viesu,

árbe biekka,

jalla šaddá bálvalit viisá.

₃₀Vanhurskása šattus

lea eallima muorra,

veahkaváldi duššada eallima.

₃₁Vanhurskkis oažžu bálkkás

eatnama alde,

man sakka eambbo dalle

ipmilmeahttun ja suttolaš!