1Viissis bárdni gullá áhčis bagadusa,
bilkár ii beroš ráŋgumis.
2Njálmmi sárdni addá
buori biepmu,
muhto behtolaččat áibbašit
veahkaválddi.
3Dat gii váruha njálmmis,
várjala iežas heakka,
šoambbisteaddji manná hevvui.
4Láiki gal hálidivččii, muhto ii oaččo,
viššala sávaldat ollašuvvá valljugasat.
5Vanhurskkis vašuha giellása,
ipmilmeahttun láhtte fasttit
ja heahpatlaččat.
6Vanhurskkisvuohta várjala
láitemeahttuma,
ipmilmeahttunvuohta jorralahttá
suttolačča.
7Muhtun láhtte riggá láhkái,
vaikko sus ii leat mihkkege,
nubbi dahkaluddá geafin,
vaikko sus lea ollu opmodat.
8Riggás lea
mainna lonistit heakkas,
váivváš ii dárbbaš gullat áitagiid.
9Vanhurskásiid čuovga báitá šearradit,
muhto ipmilmeahttumiid lámpá čáská.
10Suohpáhasa čeavli
dagaha bealkkuid,
viisát leat dat
geat guldalit rávvagiid.
11Álkit fidnejuvvon riggodat sotná,
dat gii čohkke veahážiid, oažžu lasi.
12Guhkálmas vuordin áŧesta váimmu,
ollašuvvan hálidus lea eallima muorra.
13Dat gii badjelgeahččá neavvagiid,
bártašuvvá,
dat gii jeagada cuiggodusaid,
oažžu bálkká.
14Viisá oahpahus lea eallima ája,
veahkki vealtat jápmima gielain.
15Buorre jierbmi buktá árvvu,
oskkáldasmeahttunvuohta doalvu hevvui.
16Jierbmeolmmoš dahká buot
ipmárdusain,
jalla čájeha iežas jallavuođa.
17Behtolaš sátnedoalvu
dagaha lihkuhisvuođa,
oskkáldas áirras dálkkasta.
18Geafivuohta ja heahpat vuordá dan
gii hilgu bagadusa,
gudni dan gii gullá neavvagiid.
19Ollašuvvan hálidus
lea njálggat sillui,
doavkái lea issoras gáidat bahás.
20Dat gii guoimmástaddá viisáiguin,
šaddá viissisin,
muhto dovkkiid ustibii geavvá bahás.
21Lihkuhisvuohta doarrida suttolaččaid,
vanhurskásat ožžot bálkán lihku.
22Buorre olmmoš guođđá árbbi
velá mánáid mánáidege,
muhto suttolačča opmodat
lea vurkejuvvon vanhurskásii.
23Riiddut borret geafes olbmo
eatnamiid,
buot sihkastuvvo go ii leat riekti.
24Dat gii seastá rissi, vašuha bártnis,
dat gii ráhkista su, bagada su áiggil.
25Vuoigatlaš olmmoš borrá gallás,
ipmilmeahttumiid čoavji gillá váilli.
