Sátneláskkut 14

₁Viissisvuohta hukse viesus,

jallavuohta gaikkoda dan iežas gieđaiguin.

₂Dat gii ballá Hearrás,

vádjola njulges geainnuid,

dat gii manná mohkkegeainnuid,

badjelgeahččá Hearrá.

₃Jalla sánit šaddet rissin

su iežas sealgái,

viisáid baksamat leat sin várjalus.

₄Geas eai leat vuovssát,

dan krubbá lea guorus,

gievrras burruid fámus

boahtá buorre šaddu.

₅Oskkáldas duođašteaddji ii gielástala,

vearreduođašteaddji vuoigŋá giellásiid.

₆Bilkár ohcá viissisvuođa duššás,

jierpmálaš fidne dieđu álkit.

₇Gáidda doavkki luhtte,

su ságain it gávnna dieđu.

₈Jierpmálačča viissisvuohta lea

dovdat iežas geainnu,

jallaid jallavuohta beahttá.

₉Bilkára viesus ássá sivalašvuohta,

muhto árbmu vuoigatlaš olbmuid luhtte.

₁₀Váibmu dovdá iežas bákčasa,

iige dan ilu sáhte juogadit earáiguin.

₁₁Ipmilmeahttumiid viessu

heavahuvvo,

vuoigatlaččaid goahti bissu.

₁₂Dat geaidnu mii orru olbmái

vuoigadin,

lea dattetge jápmima geaidnu.

₁₃Velá boagusteamisge

váibmu sáhttá bávččastit,

go illu nohká, de moraš báhcá.

₁₄Ávddahis olmmoš oažžu

maid ánssáša,

nu maiddái buorre olmmoš.

₁₅Dáidemeahttun jáhkká juohke sátnái,

jierpmálaš olmmoš váruha lávkkiidis.

₁₆Viissis ballá bahás ja garvá dan,

jalla lea rámppas iige ádde ballat.

₁₇Hohppos olmmoš dahká jallavuođaid,

loavddes olmmoš gudnejahttojuvvo.

₁₈Jallavuohta lea dáidemeahttumiid

hearva,

jierpmálaččaid oaivvis

lea dieđu gudnegierdu.

₁₉Bahát šaddet gopmirdit

buriid olbmuide,

ipmilmeahttumat

vanhurskásiid poarttaid guoras.

₂₀Velá geafitge vašuhit

geafes olbmo,

riggás leat ustibat eatnat.

₂₁Dat gii badjelgeahččá lagamuččas,

sudduda,

lihkolaš dat gii árpmiha vártnuheami.

₂₂Juonalaččat čádjidit,

dat geain leat buorit áigumušat,

ožžot buorrevuođa ja oskkáldasvuođa.

₂₃Buot rahčamuš

buktá valljugasvuođa,

guoros ságat dušše vahága.

₂₄Riggodat lea viisáid kruvdnu,

dovkkiid gudnegierdu lea jallavuohta.

₂₅Oskkáldas duođašteaddji

gádju heakka,

gielisteaddji beahttá.

₂₆Das gii ballá Hearrás,

lea nana suodji,

su mánát ožžot das báhtaransaji.

₂₇Hearrá ballu lea eallima ája,

dat veahkeha vealtat jápmima gielain.

₂₈Álbmoga eatnatvuohta

lea gonagasa gudni,

olbmuid vátnivuohta šaddá

ráđđejeaddji heavvun.

₂₉Gierdavaččas lea eatnat ipmárdus,

hohpposmielat lasiha iežas jallodaga.

₃₀Lojes váibmu lea rupmaša eallin,

gáđašvuohta guohcagahttá dávttiid.

₃₁Dat gii soardá vártnuheami,

bilkida su sivdnideaddji,

dat gii veahkeha váivváša,

gudnejahttá Ipmila.

₃₂Ipmilmeahttun jorrala bahávuohtasis,

vuoigatlašvuohta

suodjala vanhurskása.

₃₃Viisodat vuoiŋŋasta

jierpmálaš olbmo váimmus,

muhto jallaid gaskkas dat lea amas.

₃₄Vanhurskkisvuohta

lea álbmoga gudni,

muhto suddu lea álbmogiid heahpat.

₃₅Gonagas liiko jierpmálaš

bálvaleaddjái,

guttaheapmái son moaráhuvvá.