Sátneláskkut 15

₁Láđis vástádus loažžuda suhtu,

nordašuhtti sánit boktet moari.

₂Viisáid sárdnumis goaiku diehtu,

dovkkiid njálmmis golgá jallodat.

₃Hearrá geahčastat ollá juohke báikái,

dat vákšu sihke baháid ja buriid.

₄Njuokčama lodjivuohta

lea eallima muorra,

behtolaš sátni bávččagahttá.

₅Jalla hilgu áhčis bagadusa,

jierpmálaš váldá vuhtii cuiggodusa.

₆Vanhurskása viesus

lea stuorra riggodat,

ipmilmeahttuma dienas

manná duššás.

₇Viisáid sánit gilvet dieđu,

jallaid jurdagat čádjádaddet.

₈Ipmilmeahttumiid oaffara

Hearrá fasttáša,

vuoigatlaččaid rohkadus

lea sutnje dohkálaš.

₉Ipmilmeahttuma vádjolusa

Hearrá fasttáša,

dan gii váinnuha vanhurskkisvuođa,

son ráhkista.

₁₀Bagadus lea garas dasa

gii spiehkkasa bálgás,

dat gii vašuha cuiggodusa,

galgá jápmit.

₁₁Jábmiidáimmu čiekŋalas

lea Hearrái almmus,

man sakka eambbo dalle

olbmuid váimmut!

₁₂Bilkár ii liiko cuiggodussii,

viisáid lusa son ii mana.

₁₃Ilolaš váibmu čuvge ámadaju,

váimmu moraš hearddohuhttá olbmo.

₁₄Jierpmálaš olmmoš ohcá dieđu,

doavkkit hupmet aivve duššiid.

₁₅Buot vártnuhis olbmo

beaivvit leat bahát,

muhto ilolaš váibmu ávvuda čađat.

₁₆Buoret uhccánaš Hearrá balus

go riggodat ja ollu ráfehisvuohta.

₁₇Buoret ruonasšaddoborramuš

ja ráhkisvuohta

go vuovssábiergu ja vašši.

₁₈Hohpposlunddot olmmái

boktá bealkkuid,

guhkesmielalaš olmmoš

jaskkodahttá nákkuid.

₁₉Láikkes olbmo geaidnu

lea bastilislátnjámiestta,

vuoiggalaččaid geaidnu lea jalgat.

₂₀Viissis bárdni lea áhčis illu,

doavkkes olmmái badjelgeahččá eatnis.

₂₁Jallavuohta illudahttá jierpmeheami,

jierpmálaš olmmoš

vádjola njuolga ovddos.

₂₂Áigumušat šaddet duššin

go ii ráđđádallojuvvo,

dat ovdánit go leat ollu ráđđeaddit.

₂₃Olmmái illuda go máhttá vástidit –

mii vel buoret go sátni vuogas áigái!

₂₄Jierpmálaš vádjola bajás

eallima geainnu,

nu son vealtá mannamis

vuolás jábmiidáibmui.

₂₅Hearrá gaikkoda

čeavlás olbmuid viesu,

muhto leaskka rádjegeađggi son bisuha.

₂₆Hearrá fasttáša baháid áigumušaid,

muhto ustitlaš sánit leat buhttásat.

₂₇Dat gii bivdá vearrevuoittu,

goarida iežas viesu,

dat gii vašuha duolgguid, eallá guhká.

₂₈Vanhurskkis jurddaša

ovdal go vástida,

muhto ipmilmeahttumiid njálmmis

golgá bahávuohta.

₂₉Hearrá lea guhkkin eret

ipmilmeahttumiin,

muhto vanhurskásiid rohkadusa son gullá.

₃₀Ustitlaš geahčastat

illudahttá váimmu,

buorre sáhka addá dávttiide ađđama.

₃₁Dat gii gullá dearvvašlaš cuiggodeami,

beassá viisáid searvái.

₃₂Dat gii hilgu bagadusa, hilgu iežas,

gii oahppá cuiggodusas,

fidne áddejumi.

₃₃Hearrá ballu bagada viissisvuhtii,

gudni ovdal manná vuollegašvuohta.