Sátneláskkut 19

₁Buoret geafi ja láitemeahttun

go rikkis ja gielástalli.

₂Go olmmoš lea ávvirmeahttun,

de ii áŋgirvuohtage ávkkut,

heahttás olmmoš čádjida

ja guossala.

₃Iežas jallodat čádjidahttá olbmo,

muhto Hearrái son bahána.

₄Rikkisvuohta buktá ollu ustibiid,

geafes olmmoš

massá vel áidna ustibisge.

₅Vearreduođašteaddji

ii beasa ráŋggáškeahttá,

gielástalli ii gáddjojuvvo.

₆Eatnagat dohkkestuvvet

stuorráide,

juohkehaš guoimmástallá

árvvas olbmuin.

₇Váivváš olbmo sogat fasttášit su,

su soiget velá su ustibatge.

Duššás son iská hálahit sin.

₈Dat gii háhká jierpmi,

ráhkista eallima,

gii váldá vára ipmárdusas,

gávdná buori.

₉Vearreduođašteaddji

ii beasa ráŋggáškeahttá,

dat gii dahká vearreváli, duššá.

₁₀Ii heive doavkái eallit valljivuođas,

velá uhcit šlávvii ráđđet oaivámuččaid.

₁₁Viissisvuohta dahká olbmo

guhkesmielalažžan,

su gudni lea addit ándagassii.

₁₂Gonagasa moarri lea dego

ledjona čeargun,

su árbmu nugo rási suoldni.

₁₃Doavkkes bárdni lea áhči

lihkohisvuohta,

áhká nággárvuohta

dego goaikun robi čađa.

₁₄Viessu ja opmodat lea árbi áhčiin,

jierpmálaš áhkká lea Hearrá attáldat.

₁₅Láikodat vuodjuda

losses nahkáriidda,

láikkan šaddá nealgut.

₁₆Dat gii doallá báhkkomiid,

várjala heakkas,

gii ii beroš das mo eallá, jápmá.

₁₇Dat gii árpmiha vártnuheami,

lone Hearrái,

ja Hearrá máksá sutnje su buori dagu.

₁₈Bagat bártnát go ain lea doaivu,

ithan don sáva su jápmima.

₁₉Moarrás olmmái oažžu ráŋggáštusa;

jos veahkehat su,

de šattat dahkat dan ain ođđasis.

₂₀Guldal neavvaga

ja váldde vára bagadusas,

vai maŋimus šattašit viissisin.

₂₁Olbmos leat ollu áigumušat,

muhto Hearrá dáhttu goit ovdána.

₂₂Vuovdáivuohta heahppášuhttá

olbmo;

buoret geafi go gielis.

₂₃Hearrá ballu doalvu eallimii;

gallásin olmmoš manná ija vuoiŋŋadussii

iige deaivvahala mange bahái.

₂₄Láiki nahkeha gieđa gárrái,

muhto ii gille bajidit dan njálbmái.

₂₅Cápme bilkideaddji,

de dáidemeahttumat jirbmet,

cuiggot viisá, de son viisu ain.

₂₆Heabuheapme ja vearrái dat bárdni

gii lea veahkaválddálaš áhččásis

ja ádjá eatnis eret.

₂₇Bárdni gii heaitá

guldaleames cuiggodusa,

čádjida dieđu sániin.

₂₈Návccahis duođašteaddji bilkida

dan mii lea riekta,

ipmilmeahttumiid njálbmi

golggaha bahávuođa.

₂₉Ráŋggáštus vuordá bilkideaddji,

cábmimat doavkki sealggi.