Sátneláskkut 20

₁Viidni lea bilkideaddji,

garra juhkamuš dahká šláma,

dat gii suoibu gárremiin, ii leat viissis.

₂Dego ledjona čeargun

lea gonagasa moarri;

dat gii su moaráhuhttá, rihkku heakkas.

₃Gudni dasa gii vealtá nákkus,

dušše doavkkit hástalit riidui.

₄Láikkes olmmoš ii jorggo

eatnama čakčat

ja láddjenáigge son ii gávnna maidege.

₅Olbmo áigumušat leat dego

čiekŋalis čáhci,

muhto viissis olmmái goaivu daid bajás.

₆Olusat čurvot iežaset oskkáldasvuođa,

muhto gos gávdno luohtehahtti olmmái?

₇Vanhurskkis eallá láitemeahttumit,

lihkolaččat su mánát su maŋŋil.

₈Go gonagas čohkká duopmárstuolus,

de son čuoldá geahčastagainis eret

buot bahás olbmuid.

₉Gii sáhttá dadjat:

Mun lean buhtistan váibmon,

mun lean buhtis suttustan?

₁₀Guovttelágáš veaktageađggit

ja guovttelágáš mihtut,

goappašagaid Hearrá fasttáša.

₁₁Juo bártnáža daguin vuohttá,

leago su eallin buhtis ja vuoigat.

₁₂Gulli beallji ja oaidni čalbmi –

Hearrá lea sivdnidan goappašagaid.

₁₃Ale ráhkis nahkáriid,

amat šaddat geafin,

lihka árrat, de oaččut borrat gallás.

₁₄“Heittot, heittot,” dadjá oasti,

muhto go son vuolgá, de son rámida iežas.

₁₅Golli ja bearralat gal leat ollu,

muhto viissis sánit leat hárvenaš dávvir.

₁₆Váldde biktasa das

gii lea dáhkidan vierrása ovddas,

váldde pántta go dat guoská

amas olbmui.

₁₇Behttosa láibi njálggiida,

muhto dasto njálbmi dievvá čievrrain.

₁₈Áigumušat lihkostuvvet

ráđđádallamiin,

ale soađa ráđđádalakeahttá.

₁₉Šoambás olmmoš

muitala čiegusvuođaid,

šláttardeaddjis galggat váruhit.

₂₀Gii garuha áhčis ja eatnis,

dan lámpá čáská suhkkes seavdnjadin.

₂₁Árbi maid olmmoš ribada

menddo árrat,

ii šatta maŋimustá buressivdnádussan.

₂₂Ale daja:

“Mun mávssahan dán bahá.”

Vuordde Hearrá, son veahkeha du.

₂₃Guovttelágáš veaktageđggiid

Hearrá fasttáša,

vearreveavttaid son ii dohkket.

₂₄Hearrá stivre olbmo lávkkiid.

Mo olmmoš ieš sáhttá ipmirdit

iežas geainnu?

₂₅Olbmui lea váralaš addit

bassi lohpádusaid

ja easkka maŋŋil jurddašit.

₂₆Viissis gonagas čuoldá

ipmilmeahttumiid eret,

diktá gordnenjuvlla jorrat

sin badjel.

₂₇Hearrá goziha olbmo eallinvuoiŋŋa

ja suokkarda su siskkildasa.

₂₈Buorrevuohta ja duohtavuohta

várjalit gonagasa,

oskkáldasvuođain son doarju

iežas truvnnu.

₂₉Fápmu lea nuoraid goargu,

čurges vuovttat vuorrasiid gudni.

₃₀Buhtástussan leat bahás olbmui

guvhllit ja hávit,

časkkástagat ráidnejit olbmo siskkildasa.