Sátneláskkut 22

₁Buorre beaggin lea mávssoleabbo

go stuorra riggodat,

árvvus adnojupmi lea buoret

go golli ja silba.

₂Rikkis ja geafi gávnnadeaba:

Hearrá lea sivdnidan goappašagaid.

₃Jierpmálaš oaidná vára ja čiehkáda,

dáidemeahttumat mannet ovdan

ja šaddet gillát.

₄Vuollegašvuođa ja Hearrá balu bálká

lea riggodat, gudni ja eallin.

₅Behtolaš olbmo geainnus

leat bastilislánját ja gielat,

dat gii dáhttu gádjut heakkas,

váruha dain.

₆Oahpis nuorra olbmo dan geidnui

man son galgá vádjolit,

de son ii spiehkkas das boarisinge.

₇Rikkis lea geafi hearrá,

loatnaváldi šaddá lonejeaddji šlávvan.

₈Dat gii gilvá vearrivuođa,

láddje lihkuhisvuođa;

su moari rissi doddjo.

₉Utnolaš olmmoš buressivdniduvvo,

dainna go son attii láibbistis váivvášii.

₁₀Áje bilkára eret,

de bealku manná su mielde,

ja nággu ja heahppášuhttojupmi nohká.

₁₁Dat gii ráhkista buhtis váimmu

ja sárdnu liggosit,

oažžu ustibin gonagasa.

₁₂Hearrá čalmmit várjalit dieđu,

behtolačča sániid son dahká duššin.

₁₃Láikkan dadjá: Olgun lea ledjon,

soaittán vel gottáhallat gasku gáhta!

₁₄Vierronissona njálbmi

lea čiekŋalis hávdi;

dasa gahččá dat geasa

Hearrá lea moaris.

₁₅Jallodat gullá nuorravuhtii,

muhto bagadeaddji rissi

vuojeha dan guhkás.

₁₆Dat gii givssida váivváša

ja skeaŋku riggái,

ii das rikko, muhto gefo.

₁₇Guldal dárkilit, gula viisáid sániid,

váldde vuostá dieđu maid mun oahpahan.

₁₈Bures dagat jos vurket dan

iežat siskkildassii

ja anát dan álo

iežat baksamiid alde.

₁₉Mun oahpahan dál dutnje

Hearrá geainnu,

vai don dorvvastivččet sutnje.

₂₀Golbmalogi njuolggadusa

mun lean čállán dutnje rávan ja diehtun,

₂₁vai don oahpašit duohta sániid

ja máhtášit vástidit daidda

geat leat vuolggahan du.

₂₂Ale rievit geafes olbmos

danin go son lea geafi,

alege duolmma vártnuheami rievttis,

₂₃dasgo Hearrá čuoččuha su ášši

ja rievida rievváriin heakka.

₂₄Ale ustibastal moarrás olbmáin

alege guoibmádala suhtadahkes olbmuin,

₂₅amat hárjánit su dábiide

ja bidjat giela alccesat.

₂₆Ale leage daid láhkái

geat addalit gieđaid

ja dáhkidit velggiid;

₂₇jos dus ii leat mainna máksit,

dallehan sii dolvot vel seaŋggage

mas veallát.

₂₈Ale sirdde dološ rádjegeađggi

maid du áhčit leat ceggen.

₂₉Oainnátgo olbmá

gii lea ábas bargguinis?

Gonagasaid son manná bálvalit,

ii smávváid.