Sátneláskkut 24

₁Ale gáđaš bahás olbmuid,

ale vikka sin searvái.

₂Sii jurddašit aivve veahkaválddi,

buot maid sii sárdnot

buktá lihkuhisvuođa.

₃Viissisvuođain viessu huksejuvvo,

jierbmi dahká dan nanusin,

₄diehtu deavdá dan gámmáriid

buot mávssolaš ja čáppa gálvvuiguin.

₅Dat gii lea viissis, lea gievra,

čeahpes olmmoš nanosmahttá

iežas fámu;

₆soahtamii don dárbbašat

neavvagiid,

eatnat ráđđeaddiid vai vuoittát.

₇Viissisvuohta lea doavkái beare allat;

ráđđádallamis son ii rabas njálmmi.

₈Dat gii hutká baháid,

gohčoduvvo juonalažžan.

₉Jallas olbmo juonat leat suddu,

buohkat fasttášit bilkideaddji.

₁₀Jos don hearddohuvat

go boahtá áŧestus,

de du fápmu lea headju.

₁₁Gájo daid geat dolvojuvvojit jápmimii,

veahket daid geat suibot

steavlidanbáikái.

₁₂Jos dajat: “Eathan mii dan diehtán”,

de son gii suokkarda váimmuid, oaidná,

du heakka goziheaddji diehtá,

ja son máksá juohkehažžii

su daguid bálkká.

₁₃Bora honnega, bártnážan,

dasgo dat lea buorre,

fiinna honnet lea njálggat du guopmái.

₁₄Dakkár lea ipmárdus ja viissisvuohta

du sillui;

jos gávnnat dan,

dalle dus lea boahtteáigi,

iige du doaivu šatta duššin.

₁₅Ale vuođŋŋe vanhurskása viesu

dego ipmilmeahttun,

ale heavat su ruovttu.

₁₆Čieža geardde sáhttá vanhurskkis

gahččat ja čuožžilit fas,

muhto ipmilmeahttumat gahččet

go lihkuhisvuohta boahtá.

₁₇Ale illut go du vašálaš gahččá,

ale ávvut go son jorrala,

₁₈vai Hearrá ii bahánivčče dutnje

ja jorgalivčče iežas moari sus eret.

₁₉Ale hárpma bahádahkkiide

alege gáđaš ipmilmeahttumiid,

₂₀danin go bahás olbmos

ii leat boahtteáigi,

ja ipmilmeahttumiid lámpá čáská.

₂₁Bártnážan, bala Hearrás

ja bala gonagasas.

Ale guoibmádala daiguin

geat áigot stuimmáskit.

₂₂Lihkuhisvuohta sáhttá deaividit sin

fáhkkestaga.

Makkár dalle lea sin ráŋggáštus!

₂₃Maiddái dát leat viisáid sánit:

Dubmedettiin ii leat riekta geahččat

olbmo hápmái.

₂₄Gii cealká sivalačča sivaheapmin,

dan buohkat garuhit ja soibmet,

₂₅muhto daidda geat dubmejit riekta,

geavvá bures,

sin oassi lea lihkku ja buressivdnádus.

₂₆Dego cummá baksamiidda

lea vuoiggalaš vástádus.

₂₇Ollašuhte vuos doaimmaidat olgun

ja daga bealddu gárvvisin;

de dasto oaččut hukset iežat viesu.

₂₈Ale duođaš lagamuččat vuostá

almmá ášši haga;

Almma it dáhto beahttit sániidatguin?

₂₉Ale daja:

“Nugo son dagai munnje,

nu munge dagan sutnje,

mun mávssahan sutnje su daguid.”

₃₀Mun vázzen láikkes olbmá

bealddu meattá,

jierpmehis olbmá viidnegárddi guora.

₃₁Gáskálasat ledje šaddan dasa dievva,

oppa eatnama gokče árvvohis rásit

ja geađgeáidi lei gahččan.

₃₂Mun válden vuhtii dan maid oidnen,

ja mun válden das cuiggodusa.

₃₃Nohkas vel veaháš,

ajihustte uhccánaš,

vuoiŋŋas ain oanehis bottu

ruossalas gieđaid,

₃₄de geafivuohta falleha du

dego rievvár,

vádjitvuohta nugo vearjoolmmái.