Sátneláskkut 27

₁Ale rámit ihtáš beaivvi,

ithan don dieđe mii das lea askkis.

₂Rámidehkos du muhtun eará,

ii du iežat njálbmi,

vierroolmmoš, eai du iežat baksamat.

₃Geađgi lea lossat, sáttu deaddá,

muhto vel losit lea doavkki suhttu.

₄Suhttu lea garas, moarri dego dulvi,

muhto gii ceavzá

balahahkesvuođain?

₅Buoret almmus cuiggodeapmi

go čihkkojuvvon ráhkisvuohta.

₆Ustiba časkkástat lea vuoiggalaš,

vašálačča cummát behttet.

₇Gallánan olmmoš hilgu

fiidnámus honnega,

nealgeolbmui lea rihčanai njálggat.

₈Nugo cizáš mii lea girdilan beasis,

nu lea olmmoš guhkkin ruovttustis.

₉Olju ja suovvasat illudahttet váimmu,

ustitvuođa njálgodat nanosmahttá sielu.

₁₀Ale hilggo iežat ustiba

alege áhčát ustiba,

heahtebeaivvi ale mana vieljat vissui.

Buoret lagaš siidaguoibmi

go gáiddus viellja.

₁₁Šatta viissisin, bártnážan,

de don illudahtát mu váimmu;

don leat buoremus vástádus daidda

geat hiddjidit mu.

₁₂Viissis oaidná vára ja náđđu,

dáidemeahttun manná njeaiga

ja šaddá gillát.

₁₃Váldde biktasiid das

gii dáhkida vierroolbmo,

gáibit pántta jos son dáhkida

amas olbmo.

₁₄Jos muhtun buressivdnida

lagamuččas jitnosii árrat iđedis,

de dat adnojuvvo garuhussan.

₁₅Dego oktilaš dáhkkegoaikun

arvebeaivvi

lea bealkálas áhkká.

₁₆Su caggat lea dego biekka caggat,

dego dohppet oljju gieđain.

₁₇Ruovdi ruovddi sadjá,

olmmoš nuppi olbmo.

₁₈Gii dikšu fiikonmuora,

beassá borrat dan šaddosiid,

gii bálvala bures iežas isida,

gudnejahttojuvvo.

₁₉Čáhcegierragis oainnát iežat muođuid,

nuppi olbmos iežat váimmu.

₂₀Jábmiidáibmu ja čiekŋalas eai gallán,

eai gallán olbmo čalmmitge.

₂₁Silba geahččaluvvo stáččus ja golli uvnnas,

ja olmmoš go son rábmojuvvo.

₂₂Molle doavkki cuvkenlihtis,

cuvke su gortniid seahká:

Ii dattetge gáidda sus su jallavuohta.

₂₃Geahča bearrái sávzzaidat,

ane fuola ealustat.

₂₄Riggodat ii bistte agálaččat

iige dávvir buolvvas bulvii.

₂₅Go suoinnit leat ráddjojuvvon,

ja varas rássi ihtá,

go ávji čohkkejuvvo váriin,

₂₆dalle dus leat lábbát

main oaččut biktasiid

ja bohkát maiguin sáhtát

oastit eatnamiid,

₂₇valjit gáiccamielki

du iežat ja du bearraša biebmun,

bálvánieiddaidat ealáhussan.