Sátneláskkut 28

₁Ipmilmeahttun báhtara

vaikko ii oktage doarrit,

vanhurskkis lea oadjebas dego ledjon.

₂Stuibmás eanan

oažžu eatnat stivrejeddjiid,

muhto viissis ja jierbmás olmmái

stáđásmahttá dili.

₃Oaivámuš gii givssida váivvášiid,

lea dego ráššoarvi

mii doidá gortniid eret bealddus.

₄Láhkarihkkut

rámidit ipmilmeahttuma,

dat geat doahttalit lága,

vuosttaldit su.

₅Bahás olbmot eai ipmir

mii lea riekta,

geat ohcet Hearrá,

áddejit dan ollásit.

₆Buoret gefodat ja

láitemeahttun vádjolus

go riggodat ja moalkás geainnut.

₇Jierbmás bárdni doallá lága,

boreš olbmuid ustit

heahppášuhttá áhčis.

₈Dat gii lasiha riggodagas

reanttuiguin ja vearrevuoittuin,

čohkke dasa

gii árpmiha váivvášiid.

₉Go olmmoš biehttala gullamis lága,

dalle su rohkosge lea fastivuohta.

₁₀Gii čádjidahttá vuoigatlaččaid,

jorrala iežas roggái,

muhto láitemeahttumat ožžot buori árbbi.

₁₁Rikkis olmmái atná iežas viissisin,

muhto jierbmás geafi suokkarda su.

₁₂Go vanhurskásat ožžot fámu,

de hearvásvuohta lea stuoris;

go ipmilmeahttumat allánit,

de olbmot eai dihtto.

₁₃Gii čiehká suttuidis, ii ane lihku,

gii daid dovddasta ja gáhtá, oažžu árpmu.

₁₄Ávdugas dat gii álohii ballá Ipmilis,

dat gii buoššuda váimmus,

gahččá oasehisvuhtii.

₁₅Dego čeargu ledjon

ja speaddji guovža

lea ipmilmeahttun ráđđejeaddji

geafes álbmogii.

₁₆Dáidemeahttun ráđđejeaddji

givssida álbmoga,

dat gii vašuha vearrevuoittu,

oažžu eallit guhká.

₁₇Sorbmejeaddji

šaddá báhtarit gitta hávddi rádjái;

allos oktage veahkehehko su.

₁₈Láitemeahttun vádjola oadjebasat,

dat gii manná moalkás geainnuid,

gahččá roggái.

₁₉Dat gii bargá iežas bealddu,

oažžu borrat gallás,

dat gii váinnuha duššálašvuođa,

gallehuvvo gefodagain.

₂₀Ávda olmmái buressivdniduvvo

valljugasat,

dat gii dáhttu riggut johtilit,

ii beasa ráŋggáškeahttá.

₂₁Ii leat buorre geahččat

olbmo hápmái,

muhto láibebihtá dihtege

olmmoš verroša.

₂₂Hánis háhpohallá riggodaga,

ii son dieđe ahte heahti lea joksamin su.

₂₃Dat gii cuiggoda nuppi,

oažžu stuorit giitosa go dat

gii dušše rámida.

₂₄Dat gii rievida áhčis ja eatnis

ja dadjá: “Ii dat leat suddu” –

son ii leat sorbmejeaddji buoret.

₂₅Vuovdáivuohta boktá bealkkuid,

dat gii dorvvasta Hearrái, gallehuvvo.

₂₆Doavki dat

gii dorvvasta iežas jierbmái,

gii vádjola viisát, gáddjojuvvo.

₂₇Dat gii addá váivvášiidda,

ii gillá vádjitvuođa,

gii dahppá čalmmiidis,

oažžu ollu garuhusaid.

₂₈Go ipmilmeahttumat allánit,

de olbmot eai dihtto,

go sii duššet,

de vanhurskásat eatnánit.