Sálmmaid girji 119

₁Ávdugasat dat geaid geaidnu

lea láitemeahttun,

geat doahttalit Hearrá lága.

₂Ávdugasat sii geat dollet

su láhkabáhkkomiid

ja oppa váimmusteaset ohcet su,

₃sii geat eai daga vearrivuođa,

muhto vádjolit su geainnuid.

₄Don leat addán gohččumiiddát

vai olmmoš čuvošii daid dárkilit.

₅Vare mu vádjolus livččii stáđis,

nu ahte mun álo doahttalivččen

du mearrádusaid!

₆Go mun doalan du báhkkomiid,

de mun in šatta heahpanit.

₇Mun giittán du vuoigatlaš váimmus,

go oahpan dovdat du vuoigadis duomuid.

₈Du mearrádusaid mun doahttalan –

ale hilggo mu goassege!

₉Mo sáhttá nuorra olmmoš

várjalit bálgás buhtisin?

Dan láhkái ahte son doallá du sáni.

₁₀Mun ozan du oppa váimmustan,

ale divtte mu čádjidit eret du báhkkomiin!

₁₁Mun vurken du sáni váibmosan,

aman suddudit du vuostá.

₁₂Máidnojuvvon leage don, Hearrá!

Oahpat munnje mearrádusaidat.

₁₃Mun gulahan olbmuide buot duomuid.

₁₄Mun illudan vádjolit

du láhkabáhkkomiid mielde,

nugo olmmoš illuda riggodagas.

₁₅Mun guorahalan du gohččumiid

ja válddán vuhtii du bálgáid.

₁₆Du mearrádusat leat mu illu,

du sáni mun in vajáldahte.

₁₇Ane fuola mus, bálvaleaddjistat,

nu ahte oaččun eallit ja doahttalit du sáni.

₁₈Rabas mu čalmmiid,

vai mun oainnán du lága oavdduid.

₁₉Mun lean vieris eatnama alde,

ale čiega mus báhkkomiiddát!

₂₀Mu siellu vuoimmehuvvá,

mun háliduvan álo du mearrádusaide.

₂₁Don leat ráŋgon čeavlás olbmuid;

garuhuvvon lehkoset dat

geat čádjidit eret du báhkkomiin!

₂₂Váldde hiddjádusa

ja badjelgehččojumi mus eret,

dasgo mun doalan du láhkabáhkkomiid.

₂₃Vaikko oaivámuččat juonastit

mu vuostá,

de mun, du bálvaleaddji,

guorahalan du mearrádusaid.

₂₄Du láhkabáhkkomat leat mu illu,

dat leat mu ráđđeaddit.

₂₅Mun lean deddojuvvon

vuolás muldii.

Divtte mu eallit, nugo leat lohpidan!

₂₆Mun muitalan dutnje bálgáidan,

ja don gulat mu.

Oahpat mu dovdat du mearrádusaid!

₂₇Divtte mu ipmirdit

gohččumiiddát bálgá,

vai mun beasan guorahallat

du oavdudaguid.

₂₈Mu siellu čierru morrašis.

Čuoččáldahte mu nugo leat lohpidan!

₂₉Doala mu guhkkin eret

gielisvuođa geainnus,

oahpat munnje iežat lága

árbmugasvuođastat!

₃₀Mun lean válljen

duohtavuođa geainnu,

du duomut leat álo mu čalmmiid ovddas.

₃₁Mun doalan du láhkabáhkkomiid,

Hearrá, ale divtte mu šaddat heahpanit!

₃₂Mun dáhtun viehkat

du báhkkomiid geainnu,

danne go don leat viiddidan

mu ipmárdusa.

₃₃Hearrá, oahpat munnje

du mearrádusaid geainnu,

de mun válddán das vára

gitta loahpa rádjái.

₃₄Atte munnje áddejumi

doahttalit du lága

ja doallat dan ollásit.

₃₅Láide mu báhkkomiiddát bálgá mielde,

dasgo dat lea mu illu.

₃₆Sojat mu váimmu

du láhkabáhkkomiid beallái

ja ale vuoigatmeahttun vuoittu beallái.

₃₇Jorgal mu čalmmiid

geahččamis duššálašvuođa,

divtte mu eallit, dego leat lohpidan.

₃₈Ollašuhte iežat sáni bálvaleaddjásat

ja buohkaide geat ballet dus.

₃₉Jávkat heahpada mii baldá mu.

Du mearrádusat leat álo buorit.

₄₀Mun háliduvan du gohččumiidda.

Don leat vuoigatlaš, divtte mu eallit!

₄₁Hearrá, čájet munnje

iežat oskkáldasvuođa,

veahket mu, nugo leat lohpidan!

₄₂Mun dorvvastan du sátnái,

dan vehkiin mun máhtán vástidit

hiddjideddjiide.

₄₃Ale váldde duohtavuođa sáni

mu njálmmis eret,

mun bijan doaivvu du duomuide.

₄₄Mun doalan álo du lága,

álohii ja agálaččat.

₄₅Divtte mu vádjolit friddjavuođas,

dasgo mun jearan du gohččumiid.

₄₆Mun muitalan gonagasaide

du láhkabáhkkomiid,

mun in dárbbaš heahpanit.

₄₇Du báhkkomat leat mu illu,

dat leat munnje ráhkkásat.

₄₈Mun bajidan gieđaid du beallái,

mun guorahalan du mearrádusaid.

Dat leat munnje ráhkkásat.

₄₉Muitte sáni maid celket bálvaleaddjásat,

donhan leat addán munnje doaivvu.

₅₀Du lohpádus lea mu jeđđehus

vártnuhisvuođastan,

dat addá munnje eallima.

₅₁Čeavlás olbmot hiddjidit mu fasttit,

muhto mun in gáidda du lágas.

₅₂Mun smiehtadan du dološ duomuid,

Hearrá, dain mun oaččun jeđđehusa.

₅₃Mun dohppehalan buolli moarrái

ipmilmeahttumiid geažil

geat hilgot du lága.

₅₄Du mearrádusat leat šaddan

mu rámáduslávllan,

go mun ásan dáppe vierisin.

₅₅Ihkkunai mun muittán du, Hearrá,

mun dáhtun álo doallat du lága.

₅₆Dat lea mu doaibma:

mun válddán vára du gohččumiin.

₅₇Hearrá lea mu oassi,

mun lean lohpidan doahttalit su sániid.

₅₈Mun rohkadalan du oppa váimmustan:

Leage munnje árbmugas,

daga nugo leat lohpidan!

₅₉Mun guorahalan iežan vádjolusa,

jorgalan lávkkiidan du láhkabáhkkomiidda.

₆₀Mun in ájahala,

mun gáhčan doallat du báhkkomiid.

₆₁Ipmilmeahttumiid gielat

giessasit mu birra,

muhto mun in vajáldahte du lága.

₆₂Idjaguovdilge mun lihkan rámidit du

du vuoigatlaš duomuid dihte.

₆₃Buohkat geat ballet dus

ja dollet du gohččumiid,

leat mu ustibat.

₆₄Du buorrevuohta

deavdá eatnama, Hearrá.

Oahpat munnje mearrádusaidat!

₆₅Hearrá, don leat dahkan bures

bálvaleaddjásat,

leat dahkan nugo leat lohpidan.

₆₆Atte munnje ipmárdusa

ja buori dáiddu,

dasgo mun dorvvastan du báhkkomiidda.

₆₇Ovdal go mun vuoliduvvojin,

de mun čádjádallen,

muhto dál mun doalan du sáni.

₆₈Don leat buorre, du dagut leat buorit.

Oahpat munnje mearrádusaidat!

₆₉Čeavlás olbmot leat botnán čoahkkái

giellásiid mu vuostá,

muhto mun doalan du gohččumiid

oppa váimmustan.

₇₀Sin váibmu lea dego buoidebihttá,

muhto du láhka lea mu illu.

₇₁Munnje lei buorre

go šadden vuoliduvvot,

dalle mun bessen oahppat

du mearrádusaid.

₇₂Du njálmmi láhka

lea munnje mávssoleabbo

go golli ja silbba eatnatvuohta.

₇₃Du gieđat leat sivdnidan

ja ráhkadan mu.

Atte munnje áddejumi

oahppat du báhkkomiid!

₇₄Dat geat ballet dus,

oidnet mu ja illudit,

dasgo mun vuorddán du sáni.

₇₅Hearrá, mun dieđán ahte du duomut

leat vuoigatlaččat,

ahte oskkáldasvuođastat don vuolidit mu.

₇₆Divtte du árpmu

leat munnje jeđđehussan,

nugo leat lohpidan bálvaleaddjásat.

₇₇Leage munnje árbmugas

vai mun ealášin.

Du láhka lea mu illu.

₇₈Divtte čeavlás olbmuid šaddat heahpadii,

sii gielástallet mu sealggeduogi

almmá ášši haga.

Mun guorahalan du gohččumiid.

₇₉Bohtoset mu lusa dat

geat ballet dus,

dat geat dovdet du láhkabáhkkomiid.

₈₀Divtte mu doallat du mearrádusaid

olles váimmus,

dalle in šatta heahpanit.

₈₁Mu siellu áibbaša du bestojumi,

mun bijan doaivvu du sátnái.

₈₂Mu čalmmit áibbašit du sáni,

mun jearan: “Goas don jeđđet mu?”

₈₃Mun lean dego viidneseahkka

mii lea nárvvagan suovas,

muhto du mearrádusaid

mun in vajáldahte.

₈₄Man guhká ferte

du bálvaleaddji vuordit?

Goas don dubmet daid

geat doarrádallet mu?

₈₅Čeavlás olbmot leat goivon

bivdorokkiid mu ovdii,

sii eai beroš du lágas.

₈₆Buot du báhkkomat leat duođat.

Veahket mu, danne go olbmot

doarrádallet mu almmá siva haga.

₈₇Sii leat measta duššadan mu,

muhto mun in beahte du gohččumiid.

₈₈Don guhte leat oskkáldas,

divtte mu eallit,

de mun doalan láhkabáhkkomiid

maid don leat addán.

₈₉Hearrá, du sátni bissu nanusin almmis

agálaš áigái.

₉₀Du oskkáldasvuohta bistá

buolvvas bulvii.

Don leat vuođđudan eatnama,

ja dat bissu.

₉₁Du mearrádusaid mielde

dat bissu ain,

buot sivdnádusat leat du bálvaleaddjit.

₉₂Jos du láhka ii livčče leamaš

mu illun,

de mun livččen duššan vártnuhisvuhtii.

₉₃Mun in goassege vajáldahte

du gohččumiid,

don attát munnje eallima daid bokte.

₉₄Mun gulan dutnje. Beastte mu!

Mun dáhtun guorahallat du gohččumiid.

₉₅Ipmilmeahttumat vuđgŋet

ja dáhttot goddit mu,

muhto mun guorahalan

du láhkabáhkkomiid.

₉₆Mun lean oaidnán ahte visot nohká,

muhto du báhkkomat bissot agálaččat.

₉₇Mun ráhkistan du lága,

mun guorahalan dan geažos beaivvi.

₉₈Du báhkkomat oahpahit mu álelassii,

dat dahket mu viisábun go mu vašálaččat.

₉₉Mun lean čeahpit

go buot mu oahpaheaddjit,

dasgo mun guorahalan

du láhkabáhkkomiid.

₁₀₀Mun lean jierpmálaččat go vuorrasat,

go mun doahttalan du gohččumiid.

₁₀₁Mun in goassege lávke

bahás bálgáide,

mun dáhtun doahttalit du sáni.

₁₀₂Mun in gáidda du lágain,

dasgo don leat oahpahan mu.

₁₀₃Du sánit leat njálgát mu guopmái,

daid smáhkka lea njálgáseabbo go honnet.

₁₀₄Du gohččumiin mun oaččun jierpmi,

danne mun vašuhan buot giellása bálgáid.

₁₀₅Du sátni lea lámpá mu juolgái

ja čuovga mu bálgái.

₁₀₆Mun lean vurdnon, ja dan mun doalan:

Mun anán áimmuin du vuoigatlaš lágaid.

₁₀₇Mun lean gillán ollu, Hearrá.

Divtte mu eallit, nugo leat lohpidan!

₁₀₈Divtte mu njálmmi

eaktodáhtolaš oaffariid

dohkket dutnje, Hearrá.

Oahpat mu dovdat du duomuid!

₁₀₉Mun lean álelassii heakkaváras,

muhto mun in vajáldahte du lága.

₁₁₀Ipmilmeahttumat leat bidjan gielaid

mu ovdii,

muhto mun in čádjit du gohččumiin eret.

₁₁₁Du láhkabáhkkomat

leat mu opmodat agálašvuhtii,

dat leat mu váimmu illu.

₁₁₂Mun lean sojahan váibmon

doallat du mearrádusaid álelassii,

gitta loahpa rádjái.

₁₁₃Guovttemielat olbmuid

mun vašuhan,

muhto du lága mun ráhkistan.

₁₁₄Don leat mu galba ja suodji,

mun bijan doaivvu du sátnái.

₁₁₅Gáidet mu luhtte, bahádahkkit!

Mun dáhtun doallat Ipmilan báhkkomiid.

₁₁₆Doarjjo mu nugo

don leat lohpidan,

vai mun oaččun eallit.

Ale divtte mu doaivvu jorrat heahpadin.

₁₁₇Doarjjo mu, nu ahte mun bestojuvvon

ja muittán álo du lágaid.

₁₁₈Don hilggut buohkaid geat čádjádaddet

du mearrádusain eret,

duššás sii juonastit.

₁₁₉Dego skártta don duššadat

buot eatnama ipmilmeahttumiid,

danne mun ráhkistan

du láhkabáhkkomiid.

₁₂₀Mu rumaš soaigá,

danne go mun balan du duomuin.

₁₂₁Mun lean dahkan dan mii lea

riekta ja vuoigat.

Ale guođe mu sordiid gihtii!

₁₂₂Bealuš mu vai munnje geavvá bures,

ale suova čeavlás olbmuid soardit mu.

₁₂₃Mun áibbašan oaidnit du veahki,

bestojumi maid leat lohpidan.

₁₂₄Čájet oskkáldasvuođa bálvaleaddjásat,

oahpat mu dovdat iežat mearrádusaid.

₁₂₅Mun lean du bálvaleaddji,

atte munnje áddejumi

vai mun dovddašin du láhkabáhkkomiid.

₁₂₆Hearrá, dál lea áigi bargat!

Olbmot leat rihkkon du lága.

₁₂₇Mun ráhkistan du báhkkomiid

eambbo go golli,

eambbo go fiidnámus golli.

₁₂₈Dan dihte mun doahttalan

buot du gohččumiid

ja vašuhan buot giellása bálgáid.

₁₂₉Ovddolaččat leat du láhkabáhkkomat,

danne mun válddán dain vára.

₁₃₀Du sánit čuvgejit

go dat rahpasit,

dat dahket oktageardánis olbmo

jierpmálažžan.

₁₃₁Mun rabastan njálmmi ja sáđan,

dasgo mun áibbašan du báhkkomiid.

₁₃₂Jorgal mu beallái,

leage munnje árbmugas –

dat lea daid vuoigatvuohta

geat ráhkistit du nama.

₁₃₃Nanosmahte mu lávkkiid

nugo don leat cealkán,

ale divtte makkárge vearrivuođa

ráđđet mu.

₁₃₄Čoavdde mu olbmuid veahkaválddis,

vai sáhtán doallat du gohččumiid.

₁₃₅Čuvge muođuidat

iežat bálvaleaddjái,

oahpat mu dovdat du mearrádusaid!

₁₃₆Gatnjalat golget mu čalmmiin,

go olbmot eai doala du lága.

₁₃₇Hearrá, don leat vuoigatlaš,

du duomut leat vuoigadat.

₁₃₈Don attát láhkabáhkkomiiddát

vuoigatlašvuođas

ja stuorra oskkáldasvuođas.

₁₃₉Buolli áŋgirvuohta loaktá mu,

danne go mu vašálaččat

eai beroš du sániin.

₁₄₀Du sátni lea čilgejuvvon ja buhtis,

ja du bálvaleaddji ráhkista dan.

₁₄₁Mun lean headju ja badjelgehččojuvvon,

muhto du gohččumiid

mun in vajáldahte.

₁₄₂Du vuoigatlašvuohta lea agálaš,

du láhka lea duohtavuohta.

₁₄₃Heahti ja áŧestus leat deaividan mu,

muhto du báhkkomat leat mu illun.

₁₄₄Du láhkabáhkkomat

leat álo vuoigatlaččat.

Atte munnje ipmárdusa,

vai sáhtán eallit.

₁₄₅Hearrá, mun čuorvvun

oppa váimmustan:

Vástit munnje!

Mun válddán vára du mearrádusain.

₁₄₆Mun čuorvvun dutnje, beastte mu!

Mun doalan du láhkabáhkkomiid.

₁₄₇Juo ovdal iđedisgukso

mun čuorvvun,

mun bijan doaivvu du sátnái.

₁₄₈Go idja boahtá,

de mun lean ain gohcimin

ja guorahallamin du sáni.

₁₄₉Hearrá, gula oskkáldasvuođastat

mu čuorvasa,

divtte mu eallit, nugo du lágat lohpidit!

₁₅₀Dat geat doarrádallet mu

heabuheamit, lahkanit,

du lágas sii leat gáidan eret.

₁₅₁Muhto don, Hearrá, leat lahka,

ja buot du báhkkomat leat duođat.

₁₅₂Mun lean guhká juo oaidnán

du láhkabáhkkomiin

ahte don leat ásahan daid agálaš áigái.

₁₅₃Geahča mu heađi ja gájo mu!

Mun in leat vajáldahttán du lága.

₁₅₄Čuoččut mu ášši ja lonis mu,

divtte mu eallit, nugo leat lohpidan.

₁₅₅Ipmilmeahttumat leat

guhkkin eret bestojumis,

dasgo sii eai beroš du lágain.

₁₅₆Hearrá, du váibmoláđisvuohta

lea stuoris,

divtte mu eallit du lágaid mielde.

₁₅₇Dat geat doarrádallet

ja vuostálastet mu leat eatnagat,

muhto mun in gáidda du láhkabáhkkomiin.

₁₅₈Mun geahčan fasttášemiin

oskkáldasmeahttumiidda,

daidda geat eai doahttal du sáni.

₁₅₉Geahča, mun ráhkistan

du gohččumiid, Hearrá!

Don leat oskkáldas, divtte mu eallit!

₁₆₀Du sáni oaivádus lea duohtavuohta,

du vuoigatlaš duomut

bissot nanusin agálaš áigái.

₁₆₁Oaivámuččat doarrádallet mu

almmá siva haga,

muhto mu váibmu ballá dušše du sániin.

₁₆₂Mun illudan du sáni dihte

nugo dat gii vuoitá stuorra sállaša.

₁₆₃Mun vašuhan ja fasttášan giellása,

muhto du lága mun ráhkistan.

₁₆₄Čieža háve beaivái mun rámidan

du vuoigatlaš duomuid.

₁₆₅Sis geat ráhkistit du lága,

lea ráfi ja lihkku,

ii mihkkege jorralahte sin.

₁₆₆Hearrá, mun dorvvastan

du bestojupmái,

mun doalan du báhkkomiid.

₁₆₇Mun doalan du láhkabáhkkomiid

ja ráhkistan daid sakka.

₁₆₈Mun lean doallan du gohččumiid

ja rávvagiid,

buot mu geainnut leat du čalmmiid ovddas.

₁₆₉Badjánehkos mu váidalančuorvvas

du ovdii, Hearrá!

Atte munnje ipmárdusa, nugo leat lohpidan.

₁₇₀Bohtos mu njuoras rohkadus du ovdii,

beastte mu, nugo leat lohpidan.

₁₇₁Mu baksamiin golggiida

máidnunlávlla,

dasgo don oahpahat munnje

mearrádusaidat.

₁₇₂Mu njuovčča rámida du sáni,

dasgo buot du báhkkomat leat vuoigatlaččat.

₁₇₃Atte iežat gieđa leat mu veahkkin,

dasgo mun lean válljen du gohččumiid.

₁₇₄Hearrá, mun áibbašan du bestojupmái,

du láhka lea mu illu.

₁₇₅Divtte mu eallit,

vai mun beasan rámidit du,

lehkoset du duomut mu doarjjan.

₁₇₆Mun lean čádjidan dego láhppon sávza.

Oza bálvaleaddját,

dasgo mun in leat vajáldahttán

du báhkkomiid.