Sálmmaid girji 122

Mun illosin go munnje daddjojuvvui:

Boađe, vulgot Hearrá vissui!

₂Dál mii čuožžut du poarttain,

Jerusalem.

₃Jerusalem, don leat min gávpot,

deike min álbmot čoahkkana,

₄deike vádjolit min čearddat,

Hearrá čearddat.

Dáppe Israel rámida Hearrá nama,

nugo lea mearriduvvon.

₅Dáppe leat duopmárstuolut,

Davida soga truvnnut.

₆Rohkadallet ráfi Jerusalemii!

Vare dat geat ráhkistit du,

ealášedje ráfis!

₇Vare du muvrraid siste livččii ráfi,

oadjebasvuohta du ladniin!

₈Vieljaidan ja ustibiiddán dihte

mun sávan dutnje ráfi.

₉Hearrá, min Ipmila, viesu dihte

mun bivddán du ávkki.