Sálmmaid girji 125
Sálbma 125
1Bassivádjoluslávlla.
Dat geat dorvvastit Hearrái
leat dego Sionvárri,
dat ii lihkas, muhto bissu agálaččat.
2Nugo várit leat Jerusalema birra,
nu Hearrá várjala iežas álbmoga
dál ja gitta agálaš áigái.
3Vearrivuođa ráđđensoabbi
ii oaččo geigejuvvot
vuoigatlaččaid eatnama badjel,
vai vuoigatlaččat
eai bajidivčče gieđa vearrivuhtii.
4Hearrá, daga buriid buriide,
daidda geaid váibmu lea vuoigatlaš.
5Muhto daid geat vádjolit
moalkás bálgáid,
Hearrá, áje eret oktan daiguin
geat dahket vearrivuođa.
Ráfi Israelii!
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
