Sálmmaid girji 127
Sálbma 127
1Bassivádjoluslávlla. Salomo sálbma.
Jos Hearrá ii hukse viesu,
de duššás huksejeaddjit barget.
Jos Hearrá ii gáhtte gávpoga,
de duššás goziheaddji gohcá.
2Duššás dii lihkkabehtet árrat,
duššás gohcibehtet maŋŋit
ja rahčabehtet láibbádet dihte.
Seammá bures Hearrá addá ustibiiddásis,
go sii ođđet.
3Mánát leat Hearrá attáldat,
goaŧu šaddu lea bálká.
4Dego njuolat veagalačča gieđas
leat bártnit maid olmmoš oažžu nuorran.
5Lihkolaš dat olmmái gean
njuollaskuohpu dievva leat njuolat!
Son ii vuoittáhala
go sártnoda gávpotpoarttas
vašálaččaidisguin.
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
