Sálmmaid girji 138

Mun giittán du oppa váimmustan,

mun lávllun dutnje máidnuma,

dutnje, in eará ipmiliidda.

₂Mun gopmirdan du bassi tempela guvlui

ja rámidan du nama, danin go don

leat árbmugas ja oskkáldas.

Don leat dahkan ollu eambbo

go maid leat lohpidan.

₃Dan beaivvi go mun du čurvon,

de don vástidit,

don devdet mu roahkkatvuođain

ja gievravuođain.

₄Buot eatnama gonagasat

rámidit du, Hearrá,

dasgo sii leat gullan du sániid.

₅Sii rámidit Hearrá geainnuid,

dasgo Hearrá hearvásvuohta lea stuoris.

₆Hearrá lea allat,

muhto son geahččá vuollegaččaide,

guhkkin juo son dovdá čeavlás olbmo.

₇Vaikko mun vádjolan áŧestusas áŧestussii,

de don várjalat mu eallima.

Don geiget gieđa,

du olgeš giehta gádju mu

vašálaččaid moaris.

₈Hearrá ollašuhttá dan

maid lea áigon mu várás.

Hearrá, du árbmu bistá agálaččat.

Ale guođe gaskan iežat barggu!