Sálbma 139
1Koarrajođiheaddjái. Davida sálbma.
Hearrá, don guorahalat mu ja dovddat mu.
2Jos mun čohkkán dahje čuoččun,
de don dieđát dan,
guhkkin juo don árvidat mu jurdagiid.
3Jos mun váccán dahje veallán,
de don oainnát dan,
don dovddat buot mu geainnuid.
4Hearrá, ovdal go mus lea sátni
njuokčama alde,
de don dieđát maid mun áiggun dadjat.
5Don birastahtát mu juohke bealde,
mun lean du gieđas.
6Dat diehtu lea munnje menddo ovddolaš,
mun in nagot ipmirdit dan.
7Gosa galggan mun mannat
du Vuoiŋŋa ovddas eret?
Gosa galggan mun báhtarit
du muođuid ovddas eret?
8Jos mun manan bajás albmái,
de don leat doppe,
jos lážán oađđinsaji jábmiidáibmui,
de don leat doppenai.
9Jos mun girdilivččen iđitroađi soajáiguin
ja seivvošin ábi olggumus ravdii,
10de doppege don fáhtešit mu,
du olgeš giehta doalašii mu.
11Jos mun dajašin:
“Vare seavdnjadas čiegašii mu
ja čuovga mu birra šattašii idjan”,
12de dutnje seavdnjadas ii leat seavdnjat,
muhto idja lea čuovgat dego beaivi,
seavdnjadasge nugo čuovga.
13Don sivdnidit mu monimuččaid,
don gođđet mu eadnán goaŧus.
14Mun giittán du go lean sivdniduvvon
nu ovddolaš láhkái.
Du dagut leat ovddolaččat,
dan mun dieđán bures.
15Mu dávttit eai lean čihkkojuvvon
du čalmmiin
go mun sivdniduvvojin čiegusvuođas,
go mun hábmejuvvojin
eatnama čiekŋalasas.
16Don čalmmit oidne mu juo dalle
go mun ledjen ohki,
buot mu beaivvit ledje čállojuvvon du girjái
ovdal go dain oktage lei boahtán.
17Man mávssolaččat du jurdagat
leat munnje, Ipmil,
man stuoris daid lohku!
18Jos mun lohkagoađán daid,
de dat leat eambbo go sáttočalmmit,
ja jos gearggan lohkamis,
de mun lean ain du luhtte.
19Ipmil, vare don gottášit
ipmilmeahttumiid!
Gáidoset sorbmejeaddjit mus eret!
20Sii sárdnot behtolaččat du birra,
du vašálaččat atnet du nama duššálažžan.
21Mun vašuhan du vašálaččaid, Hearrá,
mun fasttášan sin guđet čuožžilit du vuostá.
22Olles vašiin mun vašuhan sin,
sii leat mu vašálaččat.
23Suokkar mu, Ipmil,
ja dovdda mu váimmu,
geahččal mu ja dovdda mu jurdagiid.
24Geahča leango mun bahás geainnus,
ja láide mu agálašvuođa geidnui.
