Sálmmaid girji 44

₂Ipmil, mii leat gullan

iežamet beljiiguin,

min áhčit leat muitalan midjiide

maid don dahket sin áigge,

don dolin.

₃Donhan ádjet gieđainat

álbmogiid eret,

muhto min áhčiid

don gilvet dán eatnamii,

don duššadit álbmogiid,

muhto min áhčiid don diktet leavvat.

₄Eai sii váldán eatnama mihkiin,

sin iežaset giehta ii addán

sidjiide vuoittu,

muhto du giehta, du fápmu

ja du muođuid čuovga,

dasgo don ráhkistit sin.

₅Aivve don leat mu gonagas

ja Ipmil,

don attát Jakobii vuoittu.

₆Du vehkiin mii njeaidit

vašálaččaid,

du nammii mii duolbmat

vuostálastiid.

₇Mun in dorvvas dávgái,

miehkki ii gájo mu.

₈Muhto don beasttát min

min vašálaččain,

don bijat

min vašuheddjiid heahpanit.

₉Mii rámidit Ipmila álohii,

giitit su nama

agálaš áigái. Sela

₁₀Almmatge don nordadit min eret

ja bidjet min heahpanit,

it vuolgán min soahteveagaiguin.

₁₁Don bidjet min báhtarit

vašálaččas,

min vašuheaddjit rievidedje min.

₁₂Don dahket min

sin njuovvansávzan,

don biđgejit min álbmogiid gaskii.

₁₃Don vuvdet iežat álbmoga hálbái,

it dahkan vuoitogávppi.

₁₄Don dahket min bogostahkan ránnjáidasamet,

dat geat ásset min birra,

bilkidit ja hiddjidit min.

₁₅Mii leat šaddan

sátnevájasin buot álbmogiidda,

min geažil olbmot bárdet oaivvi.

₁₆Mu heahpat lea álo

čalmmiidan ovddas,

mu ámadadju ruvssoda heahpadis

₁₇go mun šattan guldalit

bilkáriid ja hiddjideddjiid,

go mun oainnán vašálačča

gii hálida mávssahit.

₁₈Buot dát lea deaividan min,

vaikko mii eat leat vajáldahttán du

eatge rihkkon du lihtu.

₁₉Min váibmu ii leat gáidan dus,

min lávkkit eai leat earránan

du geainnus.

₂₀Almmatge don leat cuvken min

dego guovddi

ja gokčan min

seavdnjadeamos suoivaniin.

₂₁Jos mii livččiimet vajáldahttán

Ipmileamet nama

ja geaigguhan gieđaid

vieris ipmila beallái,

₂₂almma Ipmil dalle

livččii fuobmán dan?

Sonhan dovdá min váimmu

čiegus jurdagiid.

₂₃Muhto du dihte mii goddojuvvot

geažos beaivvi,

mii adnojuvvot njuovvansávzan.

₂₄Gohccá, Hearrá!

Manne don oađát?

Lihka, ale hilggo min agálaš áigái!

₂₅Manne don čiegat muođuidat,

manne vajáldahtát min heađi

ja áŧestusa?

₂₆Min siellu lea sodjalahtton

muldii,

min rumaš deddojuvvon eatnamii.

₂₇Čuožžil ja boađe midjiide

veahkkin,

lonis min, donhan leat árbmugas!