Sálmmaid girji 45

₂Mu váimmus leat dievva

čáppa sánit.

Mun lávllun lávlaga gonagasa gudnin,

mu njuovčča lea dego

čeahpes čálli peanna.

₃Don leat čábbámus

buot olbmuin,

du baksamat sárdnot litna sániid.

Danne Ipmil lea buressivdnidan du

agálaš áigái.

₄Čana miehki alimiid birra,

veagalaš,

gárvot allatvuođa ja hearvásvuođa!

₅Vuolgge vuoitit, soađa

duohtavuođa ja vuoigatvuođa

ovddas!

Dahkos du olgeš giehta

hirbmatlaš daguid.

₆Olbmot gahččet du ovdii,

bastilis njuolat deivet

gonagasa vašálaččaid váibmui.

₇Du truvdnu, Ipmil, bissu agálaččat,

du gonagassoabbi

lea vuoigatvuođa soabbi.

₈Don ráhkistat vuoigatvuođa

ja vašuhat vearrivuođa.

Dan dihte Ipmil, du Ipmil,

lea vuoidan du ilu oljjuin

eambbo go du láhkásaččaid.

₉Myrra, aloe ja kassia hádja

lea buot du biktasiin.

Streaŋggaid šuoŋat

lanjain mat leat čiŋahuvvon

elefántabátnehearvvaiguin,

illudahttet du.

₁₀Válljejuvvon nissoniiddát

searvvis

leat gonagasa nieiddat,

du olgeš bealde lea dronnet,

Ofira golliiguin čiŋadan.

₁₁Gula, nieiddažan,

guldal ja oahpa!

Vajáldahte iežat álbmoga

ja áhčát soga.

₁₂Gonagas liiko du čábbodahkii,

son lea du hearrá,

gopmir su ovdii.

₁₃Tyrosa nieida,

álbmoga riggát dohkkestuvvet

dutnje attáldagaideasetguin.

₁₄Gonagasa nieida

boahtá sisa čábbát čiŋadan,

su bivttas lea čađa gođđojuvvon

golliin.

₁₅Čikŋabiktasat gárvun

son mieđuštuvvo gonagasa ovdii.

Nuorra nieiddat, su ustibat,

bohtet su maŋis.

₁₆Sii láidejuvvojit ovdan

illudemiin ja ávvudemiin,

sii mannet gonagasa šlohttii.

₁₇Du bártnit bohtet áhčiidat sadjái,

don bijat sin oaivámužžan

miehtá máilmmi.

₁₈Mun divttán du nama beaggit

boahtti buolvvaide,

danin álbmogat rámidit du

álo ja agálaččat.