Sálmmaid girji 46

₂Ipmil lea min dorvu

ja gievravuohta,

min veahkki buot áŧestusain.

₃Danne mii eat bala

vaikko eanan doarggistivččii,

vaikko várit lihkastivčče

meara čiekŋalasas,

₄vaikko bárut šávašedje

ja máraidivčče,

vaikko várit doarggistivčče

boršu mearas. Sela

₅Eatnu ja dan jogažat

illudahttet Ipmila gávpoga,

Alimusa bassi ássansaji.

₆Ipmil lea gasku dan gávpoga,

gávpot ii lihkas.

Ipmil veahkeha dan

go iđedisguovssu badjána.

₇Álbmogat máraidit,

riikkat suibbodit,

eanan doarggista

go son diktá jienas jupmat.

₈Hearrá, Almmiveagaid Ipmil,

lea minguin,

Jakoba Ipmil lea

min nana ladni. Sela

₉Bohtet geahččat maid

Hearrá lea dahkan,

su balddihahtti daguid

eatnama alde.

₁₀Son loahpaha sođiid oppa máilmmis,

son doadjá dávggiid,

cuvke sáittiid ja buolláha galbbaid.

₁₁“Bisánehket ja dovddiidehket

ahte mun lean Ipmil,

alit go buot álbmogat,

alimus eatnama alde.”

₁₂Hearrá, Almmiveagaid Ipmil,

lea minguin,

Jakoba Ipmil lea

min nana ladni. Sela