Sálmmaid girji 47

₂Spežžot gieđaid, buot álbmogat,

bajidehket ávvučuorvasa Ipmilii!

₃Hirbmatlaš lea Hearrá, Alimus,

oppa máilmmi stuorra gonagas.

₄Son vuolida álbmogiid min váldái,

čearddaid min julggiid vuollái.

₅Son vállje midjiide árbeeatnama,

rápmin Jakobii

gean son ráhkista. Sela

₆Ipmil manná truvdnosis,

ávvučuorvasat skádjet,

dorvvet čudjet.

₇Lávlot ja čuojahehket Ipmila gudnin,

lávlot ja čuojahehket min gonagassii!

₈Ipmil lea oppa máilmmi gonagas.

Lávlot sutnje lávlaga!

₉Ipmil lea álbmogiid gonagas,

son čohkká bassi truvnnustis.

₁₀Álbmogiid oaivámuččat

čoagganit ovttas

Abrahama Ipmila álbmogiin,

dasgo eatnama veagalaččat gullet Ipmilii.

Son lea buot alimus.