Sálmmaid girji 55

₂Ipmil, guldal mu rohkosa,

ale čiehkát go mun ánun veahki.

₃Gula mu ja vástit munnje,

mu morrašat eai atte munnje ráfi.

Mun doarggistan

₄go vašálaš čuorvu

ja ipmilmeahttumat givssidit mu.

Sii fierahit vártnuhisvuođa

mu badjelii,

doarrádallet mu vašisteaset.

₅Mu váibmu doarggista rattis,

mun dohppehalan jápminballui.

₆Mun balan ja doarggistan,

suorganeapmi gokčá mu.

₇ Vare mus duvvá soaját,

dalle mun girdilivččen ja gávnnašin

alccesan orrunsaji,

₈báhtarivččen guhkás

ja válddášin orrunsaji meahcis.

Sela

₉Hoahpus mun ozašin suoji

garra biekka ja ramádaga ovddas.

₁₀Moivašuhte sin, Hearrá,

moive sin giela.

Mun oainnán veahkaválddi

ja riidaleami gávpogis,

₁₁ija beaivvi sii vázzet

dan birra muvrraid alde.

Bahávuohta ja vearrivuohta

ásset gávpogis,

₁₂billašupmi dan guovdu,

veahkaváldi ja behtolašvuohta

eai goassege gáidda dan bálgáin.

₁₃Jos mu vašálaš hiddjidivččii mu,

de dan mun gierddašin.

Jos mu vašuheaddji

čeavlástalašii munnje,

de dalle mun sáhtášin čiehkádit.

₁₄Muhto don leat mu láhkásaš,

mu ustit ja mu oahpis.

₁₅Lagaš searvevuođas

moai vácciime ávvufárus

Ipmila vissui.

₁₆Vare sii jámášedje,

vare sii manašedje eallinaga

jábmiidáibmui!

Sin orrunsaji dievva

lea bahávuohta.

₁₇Muhto mun čuorvvun Ipmilii,

ja Hearrá beastá mu.

₁₈Eahkedis ja iđedis

ja gaskabeaivvi

mun luoimman ja šuohkán,

ja son gullá mu jiena.

₁₉Vaikko eatnagat fallehit mu,

de son lonista mu soađis

ja addá munnje ráfi.

₂₀Ipmil guhte čohkká

truvnnustis dološ áiggi rájes,

gullá mu,

muhto sin son vuolida. Sela

Mu vašálaččat eai nuppástuva,

sii eai bala Ipmilis.

₂₁Behtolaš olmmoš givssida ustibiiddis,

son rihkku lihtu.

₂₂Liktásat go vuodja

leat su ságat,

muhto su váimmu jurdda

lea soahti.

Su sánit leat litnásat dego olju,

muhto bastilat

dego rohttejuvvon miehkki.

₂₃Bija nođiidat Hearrá háldui,

son atná dus fuola.

Son ii goassege suova

vuoigatlaš olbmo suoibut.

₂₄Don, Ipmil, norddastat

sorbmejeddjiid ja behtolaččaid

hávdái,

sii eai juvssa bealige

beivviineaset.

Muhto mun dorvvastan dutnje.