Sálmmaid girji 65

₂Ipmil, mii lávlut dutnje

máidnuma Sionis,

mii doallat lohpádusaid

maid attiimet dutnje,

₃dasgo don gulat rohkadusaid.

Buot olbmot bohtet du lusa

₄dovddastit suttuideaset.

Go min suttut šaddet midjiide

menddo lossadin,

de don attát daid ándagassii.

₅Ávdugas dat gean don válljet!

Don divttát su boahtit lusat

ja ássat iežat ovdašiljuin.

Du viesu buorrevuohta

ja du tempela bassivuohta

galleha min.

₆Don, min bestojumi Ipmil,

vástidat min rohkadusaide

vanhurskkisvuođa ovddolaš daguiguin.

Don leat buot eatnama ravddaid ja

gáiddus mearaid dorvu.

₇Don ceggejit váriid givrodagainat,

don ledjet gárvodan

veagalašvuođa.

₈Don jaskkodahttet

máraideaddji meara,

báruid mára ja álbmogiid šláma.

₉Dat geat ásset eatnama ravddain,

suorganit du mearkkain.

Don deavddát ávuin nuortti ja oarjji.

₁₀Don geahčat eatnama beallái

ja attát dasa arvvi,

don dagat dan šattolažžan.

Ipmila joga dievva lea čáhci.

Don oaččut gortniid šaddat,

don anát fuola eatnamis.

₁₁Don láktadat bealddu jorgunluottaid

ja dásset jorgojuvvon eatnama,

don dipmadat eatnama

arveovttiiguin

ja buressivdnidat dan šattuid.

₁₂Don kruvnnidat jagi

buriid attáldagaiguin,

šattolašvuohta vuohču du luottain.

₁₃Meahccegiettit runiidit,

dievát gárvodit ávu.

₁₄Sávzaealut čiŋahit gittiid

ja gordni gokčá legiid.

Olbmot ávvudit ja lávlot.