Sálmmaid girji 68

₂Ipmil čuožžila,

ja su vašálaččat bieđganit,

dat geat vašuhit su,

báhtarit su muođuin.

₃Nugo suovva jávká,

nugo vuodja suddá dola goardagis,

nu duššet ipmilmeahttumat

Ipmila muođuid ovddas.

₄Muhto vanhurskásat illudit,

sii illudit ja ávvudit

Ipmila muođuid ovddas.

₅Lávlot Ipmilii ja máidnot su nama,

dahket geainnu sutnje

gii manná ávdin meahci čađa.

Hearrá lea su namma,

illudehket sus!

₆Son lea oarbásiid áhčči

ja leaskkaid bealušteaddji,

Ipmil bassi ássansajistis.

₇Ipmil diktá oktoolbmuid

oažžut ruovttu,

son diktá fáŋggaid oažžut lihku

ja beassat friddjavuhtii,

muhto vuostehágolaččat šaddet

ássat guorba meahcis.

₈Ipmil, go don mannet

iežat álbmoga njunnošis,

go don johtet

ávdin meahci čađa, Sela

₉de dalle eanan doarggistii

ja almmis goaikkui čáhci

Ipmila, Sinaja Hearrá, ovddas,

Ipmila, Israela Ipmila, ovddas.

₁₀Ipmil, don diktet arvit valljugasat,

don nanosmahttet

iežat goarránan eatnama.

₁₁Dohko ásai du veahka,

buorrevuođastat don gehččet

vártnuhemiid beallái.

₁₂Hearrá vuolggaha sáni,

stuoris lea nissoniid joavku

mii buktá illusága.

₁₃Gonagasat ja soahteveagat

báhtarit, dat báhtarit,

siiddas nissonat juogadit sállaša.

₁₄Áigubehtetgo dii dušše čohkohallat

oapmegárddiid gaskkas?

Duvvá soaját leat skoađastuvvon

silbbain,

dan dolggit šelges golliin.

₁₅Go Buotveagalaš biđgii gonagasaid,

dalle muhtii Salmonvárrái.

₁₆Bašanvárri lea stuorra várri,

Bašanvárri lea čohkkás várri.

₁₇Alla čohkat, manne dii

mulgubehtet dan várrái maid Ipmil

lea dáhtton ássanbáikinis,

agálaš ássansadjinis?

₁₈Ipmila vovnnat ledje duháhat

ja fasttain duháhat,

go Hearrá bođii Sinajis bassivuođastis.

₁₉Don mannet bajás allagassii,

don váldet fáŋggaid,

don ožžot attáldagaid olbmuin,

velá vuostehágolaččainge.

Don, Hearrá Ipmil, ásat allagasas.

₂₀Máidnojuvvon lehkos Hearrá

beaivvis beaivái.

Ipmil guoddá min noađi,

son lea min bestojupmi. Sela

₂₁Ipmil lea min bestojumi Ipmil,

Hearrá, Hearrá gádju min jápmimis.

₂₂Ipmil cuvke vašálaččaidis oaivvi,

daid oaiveskálžžu geat vádjolit suttus.

₂₃Hearrá cealká:

“Bašanis mun vieččan sin,

mun buvttán sin meara čiekŋalasas.

₂₄Dalle don beasat gállit varas,

ja beatnagat ožžot čuohkat

vašálaččaid vara.”

₂₅Sii oidnet du ávvufáru, Ipmil,

mu Ipmila ja gonagasa ávvufáru

bassibáikkis.

₂₆Ovddemus vázzet lávlut,

sin maŋis hárpačuojaheaddjit

nuorra nissoniid gaskkas

geat derpet rumbbuid.

₂₇Máidnot Ipmila

tempelčoakkalmasain,

máidnot Hearrá, Israela ádjaga!

₂₈Das lea Benjamin, nuoramus

muhto ráđđejeaddji,

Juda oaivámuččaid joavku,

Sebulona oaivámuččat,

Naftali oaivámuččat.

₂₉Čájet fámot, Ipmil,

bisut dan maid don, Ipmil,

leat dahkan min ávkin.

₃₀Du tempel allána Jerusalemis,

gonagasat buktet dutnje attáldagaid.

₃₁Šikko spire mii lea rávrraid siste,

vuoksáčorraga ja álbmogiid burruid!

Duolmma julggiid vuollái daid

geat bivdet silbbaid.

Biđge álbmogiid mat hálidit soahtat!

₃₂Olbmot buktet veaikki Egyptas,

Nubia doapmá addit

attáldagaid Ipmilii.

₃₃Eatnama riikkat, lávlot Ipmilii,

čuojahehket Hearrái! Sela

₃₄Son riide almmis,

agálaš almmis.

Gullet, son bajida jienas,

veagalaš jienas.

₃₅Gudnejahttet Ipmila,

son ráđđe Israela,

su fápmu ollá balvvaid rádjái.

₃₆Ipmil lea hirbmatlaš

bassibáikkistis.

Israela Ipmil addá álbmogasas

fámu ja givrodaga.

Máidnojuvvon lehkos Ipmil!