Sálmmaid girji 69

₂Ipmil, beastte mu!

Čáhci ollá mu čoddaga rádjái.

₃Mun lean vudjon

čiekŋalis rábáhii,

mu julggiide ii leat coakci.

Mun lean boahtán čáziid čiekŋalassii,

rávdnji golgá mu badjel.

₄Mun lean čurvon váibamassii,

mu čotta goiká.

Mu čalmmit leat sotnan,

go mun lean vuordán du, Ipmil.

₅Dat geat vašuhit mu almmá siva haga

leat eambbo go vuoktačalmmit mu oaivvis.

Olusat leat dat geat bivdet mu heakka,

dat geat vašuhit mu

almmá ášši haga.

Maid in leat suoládan,

dan mun goit ferten máhcahit.

₆Ipmil, don dovddat mu jallavuođa,

mu suttut eai biso čihkosis

du čalmmiid ovddas.

₇Ale divtte šaddat heahpanit

mu dihte daid geat vurdet du,

Hearrá, Almmiveagaid Ipmil!

Ale divtte šaddat bilkiduvvot

mu dihte daid geat ohcet du,

Israela Ipmil.

₈Dasgo du dihte

mun gierddan hiddjádusa,

mu muođut leat ruvssodan heahpadis.

₉Mun lean šaddan vierisin

vieljaidasan,

eadnán mánáide mun lean

amas olmmoš.

₁₀Áŋgirvuohta du viesu dihte

lea loahpahan mu,

ja daid hiddjádusat geat hiddjidit du,

leat deaivan munnje.

₁₁Mun čirron ja fástudin,

muhto datge buvttii munnje bilkku.

₁₂Mun gárvodin horstta,

muhto šadden sin bilkolávlaga fáddán.

₁₃Olbmot bilkidit mu

go čohkkájit gávpotpoarttas,

mun lean šaddan juhkkiid lávlunfáddán.

₁₄Muhto mun rohkadalan du, Hearrá,

vare dát boddu livččii vuogas.

Ipmil, vástit munnje

stuorra buorrevuođastat,

atte munnje oskkáldas veahkát.

₁₅Gájo mu, aman vuodjut rábáhii,

gájo mu vašuheddjiidan gieđas

ja čiekŋalis čáziin.

₁₆Ale divtte rávnnji golgat mu badjel,

ale divtte čiekŋalasa njiellat mu

alege gáivvo giddet njielus

mu oaivvi badjel.

₁₇Vástit munnje, Hearrá,

dasgo du oskkáldasvuohta lea buorre,

geahča mu beallái

stuorra váibmoláđisvuođastat!

₁₈Ale čiega muođuidat

iežat bálvaleaddjis.

Mun lean heađis,

gáhča vástidit munnje!

₁₉Boađe mu lusa ja čoavdde mu,

lonis mu mu vašálaččain.

₂₀Don dieđát mo mun hiddjiduvvon,

mo mun gillán bilkku ja heahpada,

donhan oainnát buot mu vašálaččaid.

₂₁Sin hiddjádusat leat cuvken mu váimmu,

mu hávvi ii leat buorideames.

Mun vurden árpmoštallama,

muhto duššás,

soapmása gii jeđđešii mu,

muhto in gávdnan ovttage.

₂₂Sii seaguhedje mirkko

mu borramuššii,

ja go mun goiken, de sii

jugahedje munnje etteha.

₂₃Vare sin beavdi šattašii sidjiide giellan

ja sin oaffarmális lihkohisvuohtan!

₂₄Vare sin čalmmit sevnnjodivčče,

vare sin alimat suibbošedje álelassii!

₂₅Golggat suhtot sin badjelii,

divtte buolli moarát juksat sin.

₂₆Vare sin siida šattašii ávdimin,

allos oktage ásso sin gođiin.

₂₇Sii doarridit dan gean

don leat časkán,

sii lasihit su bákčasa

gean don leat hávvádahttán.

₂₈Lasit sidjiide sivalašvuođa

sivalašvuhtii,

ale suova sin goassege gáddjojuvvot.

₂₉Vare don sihkošit sin eallima girjjis,

vare sin namat eai čállojuvvoše

vuoigatlaččaid lohkui.

₃₀Muhto mun lean vártnuheapme

ja váivviduvvon,

beastte mu, Ipmil,

ja atte munnje suoji!

₃₁Mun máinnun

Ipmila nama lávlumiin,

mun gudnejahtán su

rámáduslávlagiiguin.

₃₂Dasa Hearrá liiko

eambbo go vuovssáide,

eambbo go burruide

main leat čoarvvit ja gaccat.

₃₃Váivvášat oidnet dan ja illudit,

daid váibmu ealáska

geat ohcet Hearrá.

₃₄Hearrá gullá gefiid rohkosa,

son ii hilggo olbmuidis

geat leat fáŋgavuođas.

₃₅Albmi ja eanan máidnot su,

mearat ja buot mii dain lihkada.

₃₆Ipmil beastá Siona

ja hukse Juda gávpogiid.

Doppe su olbmot ožžot ássat

ja oamastit eatnama.

₃₇Su bálvaleddjiid nálli árbe dan,

dat geat ráhkistit su nama,

besset ássat doppe.