Sálmmaid girji 72

Ipmil, oahpat gonagassii lágaidat,

gonagasa bárdnái vuoigatlašvuođa!

₂Dalle son dubme

du álbmoga riekta,

vártnuhemiid vuoiggalaččat.

₃Várit addet olbmuide ráfi

ja dievát šaddadit

vanhurskkisvuođa šattuid.

₄Dalle gonagas várjala

álbmoga vártnuhemiid rivttiid

ja beastá váivvášiid,

muhto cuvke daid geat sordet earáid.

₅Suova su eallit buolvvas bulvii,

nu guhká go beaivváš báitá

ja mánnu guolbmá.

₆Son lea dego arvi mii gahččá

láddjejuvvon gieddái,

nugo oakti mii láktada eatnama.

₇Su beivviid

vanhurskkisvuohta ovdána,

ja ráfi eatnatvuohta ráđđe

dassá go mánnu ii leat šat.

₈Son ráđđe ábis áhpái,

stuorra eanu rájes

gitta eatnama ravddaide.

₉Su vuostálastit

gopmirdit su,

su ovddas vašálaččat njollot muoldda.

₁₀Taršiša ja gáiddus rittuid

gonagasat buktet vearuid,

Saba ja Seba gonagasat attáldagaid.

₁₁Buot gonagasat luoitádit

su ovdii,

buot álbmogat bálvalit su.

₁₂Son gádju váivváša

gii čuorvu su,

vártnuheami

gean ii oktage veahket.

₁₃Son árpmiha heaju ja geafi

ja beastá váivváša áŧestusas.

₁₄Son gádju sin givssis

ja veahkaválddis,

sin heagga lea divrras su čalmmiin.

₁₅Ellos gonagas guhká

ja ožžos Saba golliid.

Vare olbmot álelassii

rohkadalašedje su ovddas

ja buressivdnidivčče su

geažos beaivvi,

₁₆vai eatnamis šattašii valjis gordni

mii bárustivččii várrečohkaid rádjái,

daid šaddu livččii suohkat

dego Libanona vuovdi

ja bealddu gordnegihput eatnagat

nugo eatnama rássi.

₁₇Vare su namma bisošii agálaččat,

muitojuvvošii nu guhká

go beaivváš báitá!

Buressivdnidehkoset buohkat

iežaset su nammii,

máidnoset buot álbmogat

su lihkolažžan.

₁₈Máidnojuvvon lehkos Hearrá,

Israela Ipmil,

dušše son dahká oavdduid.

₁₉Su hearvás namma

lehkos máidnojuvvon agálaš áigái!

Oppa eatnama dievva lea

su hearvásvuohta.

Amen, amen.