Sálmmaid girji 80

₂Gula min, Israela báimman,

don guhte doalvvut Josefa dego ealu,

don gean truvnnu kerubat guddet.

Almmustuva hearvásvuođastat

₃Efraima, Benjamina

ja Manasse čearddaide!

Čájet iežat fámu ja boađe veahkehit min!

₄Čuoččáldahte min fas, Ipmil,

divtte min oaidnit du muođuid čuovgga,

nu ahte mii bestojuvvot!

₅Hearrá, Almmiveagaid Ipmil,

man guhká du moarri borggista,

itge don guldal álbmogat rohkadusaid?

₆Don leat borahan midjiide ganjalláibbi,

jugahan gatnjaliid badjelmearálaččat.

₇Don leat bidjan min riidaleamošin

ránnjáidasamet,

min vašálaččat hiddjidit min.

₈Čuoččáldahte fas min,

Almmiveagaid Ipmil,

divtte min oaidnit du muođuid čuovgga,

nu ahte mii bestojuvvot!

₉Don váldet viidnemuora Egyptas,

ádjet álbmogiid eret ja ceggejit dan.

₁₀Dan murrii don njásket saji,

ja dat ruohtastuvai ja devddii eatnama.

₁₁Dat suoivvanasttii váriid,

dan oavssit gokče stuorra sederiid.

₁₂Dat lebbii ovssiidis meara rádjái,

surggiidis gitta Eanu rádjái.

₁₃Manne don gaikkodit áiddi dan birra,

nu ahte buohkat geat vázzet meattá,

sáhttet čoaggit dan šattuid?

₁₄Vuovddi meahccespiidni jursá dan,

meahci smávva eallit borret dan.

₁₅Máhca min lusa,

Almmiveagaid Ipmil,

geahča vuolás almmis ja oainne!

Bealuš dán viidnemuora,

₁₆dan vesá maid leat ceggen

olgeš gieđainat,

dan bártni geasa don ieš leat addán fámu.

₁₇Vare du muođuid ovddas

duššašedje dat geat leat dan njeaidán

ja boaldán!

₁₈Vare du giehta várjalivččii su

gii lea du olgeš gieđa bealde,

dan olbmá geasa don leat addán fámu.

₁₉Mii eat gáidda dus.

Suova min eallit,

de mii čuorvut du nama.

₂₀Čuoččáldahte fas min, Hearrá,

Almmiveagaid Ipmil,

divtte min oaidnit du muođuid čuovgga,

de mii bestojuvvot!