Sálmmaid girji 86

Hearrá, gula mu rohkosa ja vástit munnje,

mun lean váivváš ja vártnuheapme.

₂Várjal mu heakka,

mun lean oskkáldas.

Beastte bálvaleaddját, Ipmil,

mun dorvvastan dutnje.

₃Hearrá, leage munnje árbmugas!

Geažos beaivvi mun čuorvvun dutnje.

₄Illudahte bálvaleaddját sielu!

Hearrá, mun bijan iežan doaivvu dutnje.

₅Hearrá, don leat buorre,

don attát ándagassii,

don leat árbmugas buohkaide

geat čurvot du.

₆Hearrá, gula mu rohkosa,

guldal go mun ánun veahki.

₇Mun čuorvvun du heahtebeaivvi,

ja don vástidat munnje.

₈Hearrá, ipmiliid gaskkas

ii leat du veardásaš,

ii mihkkege leat veardideames du dahkun.

₉Buot álbmogat maid leat sivdnidan,

bohtet ja gopmirdit du ovdii,

dat gudnejahttet du nama, Hearrá.

₁₀Dasgo don leat stuoris

ja dagat oavdudaguid,

aivvefal don leat Ipmil.

₁₁Hearrá, oahpat munnje geinnot,

vai mun máhtán vádjolit du duohtavuođas.

Atte munnje juogatkeahtes váimmu,

vai mun balan du namas.

₁₂Hearrá, mu Ipmil, mun giittán du

oppa váimmustan,

mun gudnejahtán du nama agálaččat.

₁₃Du árbmugasvuohta lea stuoris,

don bestet mu sielu

jábmiidáimmu čiekŋalasas.

₁₄Ipmil, čeavlás olbmot čuožžilit

vuosttildit mu,

veahkaválddálaččaid joavku

bivdá mu heakka.

Eai sii beroš dus.

₁₅Muhto don, Hearrá,

leat váibmoláđis ja árbmugas Ipmil,

don leat gierdavaš,

du buorrevuohta

ja oskkáldasvuohta lea stuoris.

₁₆Geahča mu beallái ja árpmit mu!

Atte munnje fámu, beastte mu!

Munhan lean du bálvaleaddji,

du bálvaleaddjinissona bárdni.

₁₇Atte munnje mearkka das

ahte don leat buorre.

Divtte daid geat vašuhit mu,

oaidnit ahte don, Hearrá,

veahkehat ja jeđđet mu.