Sálmmaid girji 88

₂Hearrá, mu bestojumi Ipmil,

mun čuorvvun du ijatbeaivái.

₃Divtte mu rohkosa boahtit

du muođuid ovdii,

jorgal bealji mu čuorvasa beallái!

₄Mu siellu lea gallánan oasehisvuođas,

mun lean lahka jábmiidáimmu.

₅Mun adnojuvvon daid láhkásažžan

geat njidjet hávdái,

lean dego olmmái

gii lea massán eallinfámu.

₆Mun lean guđđojuvvon jábmiid searvái,

mun lean dego goddojuvvon olbmot

geat veallájit hávddis,

dat geaid don it šat muitte,

geaid du giehta ii veahket.

₇Don leat bálkestan mu čiekŋalis roggái,

sevdnjes, botnihis skurčui.

₈Du moarri deaddá mu lossadit,

du siiggát márret mu badjel. Sela

₉Don leat ádján eret oahppásiid mu luhtte,

nu fastin don leat dahkan mu sin čalmmiin.

Mun lean dahppojuvvon sisa,

in beasa olggos.

₁₀Hearrá, mu čalmmit leat čuovggahuvvan,

geažos beaivvi mun čuorvvun du

ja geaigguhan gieđaid du guvlui.

₁₁Dagatgo don oavdduid jábmiide,

čuožžilitgo jámežat máidnut du? Sela

₁₂Muitaluvvogo hávddis

du árbmugasvuohta,

jábmiidáimmus, ahte leat oskkáldas?

₁₃Leatgo du oavdudagut dovdosat

seavdnjadasas,

du buorrevuohta vajáldumi eatnamis?

₁₄Muhto mun čuorvvun du, Hearrá,

iđedis juo mu rohkadus badjána du ovdii.

₁₅Hearrá, manne leat hilgon mu,

manne čiegat mus muođuidat?

₁₆Nuorravuođa rájes

mun lean leamaš vártnuheapme

ja lahka jápmima.

Mun guottán du balddáhusaid

ja dorvvuhuvan.

₁₇Du buolli moarri lea mannan mu badjel,

balddáhusat duššadit mu.

₁₈Geažos beaivvi

dat leat mu birra dego čáhci,

dat birastahttet mu juohke guovllus.

₁₉Buot mu ustibiid ja lagaš olbmuid

don leat ádján mu luhtte,

seavdnjadas lea mu áidna oahpis.