Sálmmaid girji 96

₁Lávlot Hearrái ođđa lávlaga!

Lávllo Hearrá gudnin, oppa eanan,

₂lávlot Hearrái, máidnot su nama,

gulahehket su bestojumi beaivvis beaivái!

₃Muitalehket álbmogiidda su gudni,

buot olbmuide su oavdudaguid.

₄Stuoris lea Hearrá, sakka rámidahtti,

hirbmoseabbo go buot ipmilat.

₅Buot álbmogiid ipmilat

leat eahpeipmilat,

muhto Hearrá lea dahkan almmiid.

₆Allatvuohta ja hearvásvuohta lea su birra,

fápmu ja čábbodat su tempelis.

₇Gudnejahttet Hearrá,

buot eatnama álbmogat,

dovddastehket Hearrá fámu,

₈dovddastehket su nama gudni!

Bohtet su ovdašiljuide, buktet oaffariid,

₉luoitádehket Hearrá ovdii

bassi čikŋabiktasat gárvun!

Doarggis su muođuid ovddas, oppa eanan!

₁₀Muitalehket álbmogiidda:

Hearrá lea gonagas!

Máilbmi bissu nanusin, ii dat lihkkas.

Son dubme álbmogiid vuoigatlaččat.

₁₁Illudehkos albmi, ávvudehkos eanan!

Máraidehkos mearra ja buot mii deavdá dan,

₁₂ávvudehkos eanan ja buot mii das šaddá.

Dalle buot vuovddi muorat ávvudit

₁₃Hearrá muođuid ovddas,

danin go son boahtá!

Son boahtá buktit vuoigatvuođa,

ráđđet máilmmi vuoigatlaččat

ja álbmogiid oskkáldasat.