Sálmmaid girji 97

₁Hearrá lea gonagas!

Ávvudehkos eanan,

illudehkoset gáiddus rittut!

₂Balva ja seavdnjadas lea su birra,

vuoigatvuohta ja vanhurskkisvuohta

leat su truvnnu vuođđu.

₃Dolla manná su ovddas

ja loaktá buot su vašálaččaid.

₄Su álddagasat čuvgejit oppa máilmmi,

eanan oaidná dan ja doarggista.

₅Várit suddet dego gáhčči

Hearrá ovddas,

oppa eatnama Hearrá muođuid ovddas.

₆Albmi sárdnida su vanhurskkisvuođa,

buot álbmogat oidnet su hearvásvuođa.

₇Buohkat geat bálvalit govaid,

šaddet heahpadii,

buohkat geat rámádallet

duššálaš ipmiliiguin.

Buot ipmilat gopmirdit su.

₈Sion gullá dan ja ávvuda,

Juda gávpogat illudit,

danin go du duomut, Hearrá, leat vuoigadat.

₉Don, Hearrá,

leat Alimus oppa eatnamis,

aliduvvon badjel buot ipmiliid.

₁₀Dii geat ráhkistehpet Hearrá,

vašuhehket bahá!

Son várjala daid heakka geat ballet sus,

son beastá sin ipmilmeahttumiid gieđas.

₁₁Beaivi badjána vanhurskásiidda,

illu daidda geaid váibmu lea vuoigatlaš.

₁₂Illudehket Hearrás, vanhurskásat,

rámidehket su bassi nama!