Sálmmaid girji 98

Lávlot Hearrái ođđa lávlaga,

dasgo son lea dahkan ovddolaš daguid.

Su olgeš giehta, su bassi giehta

lea addán sutnje vuoittu.

₂Hearrá lea almmuhan bestojumis,

son lea almmustahttán álbmogiidda

iežas vanhurskkisvuođa.

₃Buorrevuođain ja oskkáldasvuođain

son lea muitán Israela soga.

Buot eatnama álbmogat leat oaidnán

min Ipmila bestojumi.

₄Bajit illučuorvasa Hearrái, oppa eanan!

Ávvudehket ja lávlot máidnuma!

₅Lávlot ja čuojahehket lyra Hearrái,

čuojahehket lyra ja lávlot!

₆Čuojahehket dorvviid ja trompehtaid,

bajidehket ávvučuorvasa Hearrái, gonagassii!

₇Máraidehkos mearra

ja buot mii dan deavdá,

eanan ja dat geat das ásset.

₈Spežžoset jogat gieđaid,

ávvudehkoset buot várit

₉Hearrá muođuid ovddas,

dasgo son boahtá ráđđet eatnama.

Son ráđđe máilmmi vanhurskásit,

álbmogiid vuoigatlaččat.