Almmustus 11

₁Munnje addojuvvui mihttorávra mii lei dego soabbi, ja munnje celkojuvvui:

“Mana mihtidit Ipmila tempela ja áltára ja loga daid geat doppe rohkadallet. ₂Muhto divtte tempela ovdašilju orrut, ale dan mihtit, dainna go dat lea addojuvvon báhkiniidda. Sii dulbmet bassi gávpoga njealljelogiguokte mánu.

₃Mun divttán iežan guokte duođašteaddji geat leaba gárvodan horstta, profehtastallat duhát guoktečuođiguhttalogi beaivvi.” ₄Duođašteaddjit leaba dat guokte oliivamuora ja guokte lámppá mat čužžot eatnama Hearrá ovddas. ₅Jos guhtege viggá sudno vahágahttit, de boahtá sudno njálmmis dolla mii duššada sudno vašálaččaid. Juohkehaš gii viggá sudno vahágahttit, jápmá dáinna lágiin. ₆Sudnos lea fápmu dahppat almmi, vai arvi ii boađe oppa dan áiggi go soai profehtastallaba. Sudnos lea maid fápmu nuppástuhttit čáziid varran ja časkit eatnama juohkelágán givssiiguin nu dávjá go dáhttuba.

₇Go soai leaba ollašuhttán iežaska duođaštanbarggu, de soahttá sudnuin beahtu mii badjána čiekŋalasas, ja dat vuoitá sudno ja goddá sudno. ₈Sudno rupmašat njaŋgájit dan stuorra gávpoga gáhtas mii vuoiŋŋalaš gielas gohčoduvvo Sodoman ja Egyptan, ja gos maiddái sudno Hearrá russiinávlejuvvui. ₉Bealnjealját beaivvi olbmot buot eatnamiin, čearddain, gielain ja álbmogiin oidnet sudno rupmašiid eaige suova daid hávdádit. ₁₀Eatnama ássit illudit sudno dihte, ávvudit ja sáddejit attáldagaid guhtet guimmiidasaset, dainna go dát profehta guovttos leigga leamaš giksin eatnama ássiide.

₁₁Muhto dan bealnjealját beaivvi geažes bođii profehtaide eallima vuoigŋa maid Ipmil lei vuolggahan, ja soai lihkaiga čuoččat. Buohkat geat dan oidne, ballájedje sakka. ₁₂Olbmot gulle go almmis bođii alla jietna: “Boahtti deike bajás!” Ja vašálaččaideaskka oaidnut soai manaiga bajás albmái balvvas. ₁₃Dan bottus šattai stuorra eanandoarggástus. Logát oassi gávpogis gahčai, ja eanandoarggástusas dušše čiežaduhát olbmo. Earrásat suorganedje ja gudnejahtte almmi Ipmila.

₁₄Nubbi vuoi-čuorvvas lea mannan. Muhto goalmmát boahtá fargga.

₁₅Čihččet eŋgel bosui iežas dorvve. Almmis gullojedje alla jienat mat čurvo:

₁₆Dalle dat guokteloginjeallje vuorrasa geat čohkkájedje truvnnuineaset Ipmila ovddas, luoitádedje muđolassii, rohkadalle Ipmila ₁₇ja celke:

₁₉Almmis rabastuvvui Ipmila tempel, ja tempelis oidnojuvvui lihtuárka. Álddagasat šleđgo, baján jumai, eanan doarggistii ja stuorra čuorbmasat gahčadedje.