Almmustus 12

₁Almmis oidnojuvvui stuorra mearka: Nisson geas lei gárvun beaivváš, mánnu julggiid vuolde ja guoktenuppelohkái nástti oaivvis gierdun. ₂Son lei áhpeheapmin ja čuorvvui ávttain ja garra riegádahttinbákčasiin.

₃Almmis oidnojuvvui velá nubbi mearka: Stuorra dollarukses guovdi mas ledje čieža oaivvi ja logi čoarvvi ja kruvdnu guđege čieža oaivvis. ₄Seibbiinis dat njámastii goalmmádasa almmi násttiin ja bálkestii daid eatnamii. Guovdi čuoččui nissona ovddas gii lei riegádahttimin, vai beassá njielastit máná dallánaga go dat riegáda.

₅Nisson riegádahtii mánás, bártni gii ráđđešii buot álbmogiid ruovdesoppiin. Mánná rohttejuvvui Ipmila ja su truvnnu lusa, ₆ja nisson báhtarii meahccái. Dohko Ipmil lei ráhkadan sutnje saji gos son bibmojuvvošii duhát guoktečuođiguhttalogi beaivvi.

₇Almmis buollái soahti. Mikael ja su eŋgelat sohte guvddiin. Guovdi ja dan eŋgelat sohte, ₈muhto dat vuoittáhalle iige dain lean šat mihkkege sajiid almmis. ₉Ja dat stuorra guovdi, boares gearpmaš, mii gohčoduvvo beargalahkan ja Sáhtánin ja mii fille oppa máilmmi, bálkestuvvui vulos eatnamii, ja maiddái dan eŋgelat oktan dainna. ₁₀Mun gullen alla jiena cealkimin almmis: “Dál lea boahtán bestojupmi, min Ipmilis lea dál fápmu ja riika ja sus gean son lea vuoidan, lea váldi. Dál Guoddaleaddji lea bálkestuvvon vuolás, dat gii min Ipmila ovddas guoddalii min vieljaid ijatbeaivái. ₁₁Dat lea vuoittáhallan sidjiide, Lábbá varra ja sin duođaštusa sátni lea addán sidjiide vuoittu. Sii eai ráhkistan iežaset heakka, muhto ledje miehtásat velá jápmitge. ₁₂Dan dihte ávvut, albmi, ja dii geat doppe ássabehtet! Muhto vuoi eatnama ja ábi – beargalat lea boahtán vuolás din lusa! Su moarri lea stuoris, danne go son diehtá ahte su áigi lea oanehaš.”

₁₃Go guovdi oinnii ahte lei bálkestuvvon vulos eatnamii, de dat doarrádallagođii nissona gii lei riegádahttán bártni. ₁₄Muhto nissonii addojuvvojedje stuorra goaskima soaját, vai son girdá meahccái báikái gos son bibmojuvvo áiggi, guokte áiggi ja áigebeale, gáidosis gearbmaša olámuttos. ₁₅Gearpmaš šávgalii njálmmis nissona maŋŋái joga vai dat doalvu su, ₁₆muhto eanan veahkehii nissona: Dat rabastii njálmmi ja njielastii joga maid guovdi lei šávgalan njálmmis. ₁₇Guovdi moaráskii nissonii ja vulggii soahtat nissona eará mánáiguin, daiguin geat leat oskkáldasat Ipmila báhkkomiidda ja Jesusa duođaštussii. ₁₈Ja dat čuoččastii ábi sáddui.