Almmustus 13

₁Mun oidnen beađu badjáneamen ábis. Das ledje logi čoarvvi ja čieža oaivvi, ja guđege čoarvvis lei kruvdnu ja guđege oaivái lei čállojuvvon hiddjideaddji namma. ₂Beahtu maid mun oidnen, lei leopárdda láhkásaš, muhto juolggit das ledje dego guovžžas ja njálbmi dego ledjonis. Guovdi attii dasa iežas fámu ja truvnnu ja stuorra válddi. ₃Mun oidnen ahte okta dan oivviin orui ožžon jápminhoakka, muhto hávvi lei savvon.

Oppa eanan ovddošii beađu ja čuovvulii dan. ₄Buohkat gopmirdedje guovddi mii lei addán behtui válddi. Sii gopmirdedje maiddái beađu ja dadje: “Gii lea beađu láhkásaš? Gii sáhttá soahtat dainna?”

₅Behtui addojuvvui njálbmi mii bilkida ja sárdnu stuorra sániid, ja dat oaččui dan fámu njealljelogiguovtti mánnui. ₆Dat rabastii njálmmi ja bilkidišgođii Ipmila. Dat bilkidii su nama, su ássansaji ja buohkaid geat ásset almmis. ₇Dasa addojuvvui lohpi soahtat bassi olbmuiguin ja vuoitit sin badjel, ja dan gihtii addojuvvojedje buot čearddat ja álbmogat, gielat ja eatnamat. ₈Buot eatnama ássit rohkadallet beađu, buohkat geaid namma ii máilmmi vuođđudeami rájes leat leamaš čállojuvvon njuvvojuvvon Lábbá eallima girjái.

₉Geas leat bealjit, dat gullos:

₁₁De mun oidnen nuppi beađu badjáneamen eatnamis. Das ledje guokte čoarvvi dego lábbás, muhto dat sártnui dego guovdi. ₁₂Dat atná vuosttaš beađu olles válddi ja bidjá eatnama ja dan ássiid rohkadallat vuosttaš beađu, dan man jápminhoagga lei buorránan. ₁₃Dat dahká stuorra mearkkaid ja oažžu velá dolage gahččat almmis eatnamii olbmuid oaidnut. ₁₄Daid mearkkaiguin maid dat dahká vuosttaš beađu nammii, dat fille eatnama ássiid ráhkadit gova dan beađu gudnin mii lei hávvádahttojuvvon mihkiin muhto ealáskan. ₁₅Dat lea ožžon fámu addit eallinvuoiŋŋa beađu govvii nu ahte govva máhttá velá sárdnutge, ja fámu gottihit buohkaid geat eai rohkadala beađu gova. ₁₆Dat bágge buohkaid, smávváid ja stuorráid, riggáid ja gefiid, friddja olbmuid ja šlávaid, bidjat mearkka olgeš giehtaseaset dahje gálloseaset. ₁₇Ii oktage oaččo oastit iige vuovdit maidege, jos sus ii leat dát mearka mii lea beađu namma dahje dan nama lohku.

₁₈Dás adnojuvvo viisodat. Geas lea jierbmi, dat čilgejehkos beađu nama logu: Dat lea muhtun olbmo lohku, ja dat lohku lea guhttačuođiguhttalogiguhtta.