Eallima čáhci ja eallima muorra
1Eŋgel čájehii munnje eallima čázi joga mii šealgá dego kristálla ja golgá Ipmila ja Lábbá truvnnus. 2Gávpoga váldogáhtas, johkasurggiid gaskkas šaddá eallima muorra. Muorra šaddada šaddosiid guovttenuppelohkái geardde jagis, ođđa šaddosiid juohke mánus, ja muora lasttain álbmogat ožžot dearvvašvuođa. 3Ii mihkkege garuhusaid leat šat. Gávpogis lea Ipmila ja Lábbá truvdnu, ja su bálvaleaddjit bálvalit su. 4Sii ožžot oaidnit su muođuid, ja su namma lea sin gállus. 5Idja ii leat šat, ii oktage dárbbaš lámppá iige beaivváža čuovgga, danin go Hearrá Ipmil lea sin čuovgá. Sii ráđđejit gonagassan álo ja agálaččat.
Hearrá Jesus boahtá fargga
6Eŋgel celkkii munnje: “Dát leat luohtehahtti ja duohta sánit. Hearrá guhte lea profehtaid vuoiŋŋaid Ipmil, lea vuolggahan eŋgelis čájehit bálvaleddjiidasas dan mii fargga dáhpáhuvvá. 7Mun boađán fargga. Ávdugas dat gii vurke dán girjji profehtalaš sániid.”
8Mun, Johannes, lean gullan ja oaidnán buot dán. Go mun ledjen dan gullan ja oaidnán, de mun luoitádin eŋgela julggiid ovdii rohkadallat su gii lei čájehan dan munnje. 9Muhto son celkkii: “Ale bargga nie! Mun lean Ipmila bálvaleaddji nugo don ja profehtat, du vieljat, ja buohkat geat vurkejit dán girjji sániid. Ipmila don galggat rohkadallat!” 10Son celkkii munnje: “Ale seailit dán girjji profehtalaš sániid, danin go áigi lea lahka.
11Dahkos vearredahkki ain veriid,
ellos buhtismeahttun ain buhtismeahttumit,
dahkos vanhurskkis ain
vanhurskkisvuođa,
ovdánehkos bassi olmmoš
ain bassivuođas.”
12“Mun boađán fargga, ja boađedettiinan mun buvttán juohkehažžii bálkká, mávssán iešguhtiige su daguid mielde. 13Mun lean Alfa ja Omega, vuosttaš ja maŋimuš, álgu ja loahppa.
14Ávdugasat dat geat basset biktasiiddiset. Sii ožžot vuoigatvuođa borrat eallima muoras ja mannat poarttaid ráigge gávpogii. 15Olggobealde leat beatnagat ja noidošeaddjit, furrošeaddjit, sorbmejeaddjit ja eahpeipmiliid bálvaleaddjit ja buohkat geat giellásiid ráhkistit ja sárdnot.
16Mun, Jesus, lean vuolggahan din lusa iežan eŋgela duođaštit dán searvegottiide. Mun lean Davida vesá ja sohka, čuvges guovssonásti.”
17Vuoigŋa ja moarsi cealkiba: “Boađe!” Dat gii dán gullá, celkos: “Boađe!” Bohtos dat gii goiká. Gii dáhttu, dat oažžu eallima čázi nuvttá.
18Mun duođaštan juohkehažžii gii gullá dán girjji profehtalaš sániid: Jos guhtege lasiha daidda maidege, de Ipmil bidjá su gillát daid givssiid maid birra dán girjjis lea čállojuvvon. 19Jos guhtege váldá eret juoidá dán profehtalaš girjji sániin, de Ipmil váldá sus eret su oasi eallima murrii ja bassi gávpogii, maid birra dán girjjis lea čállojuvvon.
20Son gii duođašta dán, cealká: “Duođaid, mun boađán fargga.” Amen. Boađe, Hearrá Jesus!
21Hearrámet Jesus Kristusa árbmu lehkos buohkaiguin.
