Earát
1Gosa du ráhkis lea mannan,
don nissoniin čábbámus?
Gosa du ráhkis lea vuolgán?
Divtte min veahkehit ohcat su!
Moarsi
2Mu ráhkis lea mannan gilvvagárdásis,
njálggahájat urttasbeaŋkkaid lusa,
návddašit iežas urttasgárddi šaddosiid
ja čoaggit liljáid.
3Mu ráhkis lea mu ja mun lean su,
son geahččá ealus liljáid gaskkas.
Irgi
4Ráhkkásažžan,
don leat čáppis dego Tirsa,
fávru dego Jerusalem,
hirbmatlaš nugo soahteveahka
leavggainis.
5Jorgal mus čalmmiidat,
dat movttáskahttet mu!
Du vuovttat leat dego gáicaeallu
mii luoitáda Gileadis.
6Du bánit leat dego sávzzat
mat aiddo leat goargŋumin lávggus.
Buohkain leat jumežat,
ii oktage leat almmá lábbá haga.
7Dego granáhtaehpelbealit
leat du geađđašat beaittaliinni duohken.
8Guhttalogi leat dronnegat,
liigeáhkát gávccilogi
ja nuorra nieiddat lohkameahttun ollu –
9okta lea almmatge mu duvvá,
mu iežan fávru.
Son lea eatnis áinnohaš,
riegádahttis jiellat.
Nieiddat oidnet su
ja máidnot lihkolažžan,
dronnegat ja liigeáhkát rámidit su:
10“Gii son lea?
Son suonjarda dego iđitroađđi,
son lea fávru dego láđasmánnu,
šearrat dego beaivváš,
hirbmatlaš nugo soahteveahka
leavggainis.”
11Mun mannen niehttegárdái
geahččat mo leahki runiidii,
oaidnit juogo viidnemuoras
leat ođđa iđut,
juogo granáhtaehpelmuorat liđiidit.
12Muhto ovdal go oppa diehttájinge,
de mun čuovvulin iežan hálu ja čohkánin
jiellatustiban vovnnaide.
Earát
13Jorggit, jorggit, Šulama nieida,
jorggit, jorggit,
vai mii beassat oaidnit du!
Moarsi
Manne dii dáhttubehtet
oaidnit Šulama nieidda,
go son dánsu ráidduid gaskkas?
