Sakarja 3

₁De Hearrá divttii mu oaidnit bajimusbáhppa Josua gii čuoččui Hearrá eŋgela ovddas. Sáhtán čuoččui Josua olgeš bealde, gearggusin sivahallat su. ₂Hearrá eŋgel celkkii Sáhtánii: “Hearrá belkos du, Sáhtán! Hearrá, guhte lea válljen Jerusalema, belkos du! Iigo dát olmmái leat ráddi, dolas gáddjojuvvon?” ₃Josua čuoččui eŋgela ovddas, duolva biktasat gárvun. ₄Eŋgel celkkii bálvaleddjiidasas: “Nullet sus duolva biktasiid!” Josuai son celkkii: “Geahča, mun lean váldán du suddovealggi eret, ja mun gárvvuhan dutnje ávvubiktasiid.” ₅De son celkkii bálvaleddjiidasas: “Bidjet buhtis turbána su oaivái!” Bálvaleaddjit bidje buhtis turbána Josua oaivái ja gárvvuhedje sutnje ávvugárvvuid, dan botta go Hearrá eŋgel čuoččui das. ₆De Hearrá eŋgel duođaštii Josuai:

₈Gula, Josua, bajimusbáhppa! Don ja dat báhpat geat čohkkájit du ovddas, lehpet mearkan das ahte mun vuolggahan bálvaleaddján Vesá. ₉Dan geađgái maid mun lean bidjan Josua muođuid ovdii, dán ovtta geađgái mas leat čieža čalmmi, mun goban čállosa, cealká Hearrá, Almmiveagaid Ipmil. Ovtta áidna beaivvis mun válddán eret dán eatnama suddovealggi. ₁₀Dan beaivvi, cealká Hearrá, Almmiveagaid Ipmil, dii bovdebehtet guhtet guimmiideattet guossái viidnemuora ja fiikonmuora vuollái.