Sefanja 2

₁Čoagganehket, bohtet čoahkkái,

buot dii heabuhis olbmot,

₂ovdal go Hearrá mearrádus

šaddá duohtan

– beaivvithan girdet dego sáđut bieggan –

ovdal go Hearrá buolli moarri deaivida din,

ovdal go didjiide boahtá

Hearrá moari beaivi.

₃Ohcet Hearrá,

buot eatnama vuollegaččat

geat doahttalehpet su báhkkomiid.

Ohcet vanhurskkisvuođa,

ohcet vuollegašvuođa.

Dalle dii veadjibehtet várjaluvvot

Hearrá moari beaivvi.

₄Gaza báhcá guorusin,

Aškelon šaddá ávdimin.

Beaiveguovdil Ašdoda olbmot

áddjojuvvojit eret,

Ekron gaikojuvvo

oktan ruohttasiiddisguin.

₅Vuoi din geat ássabehtet

mearragáttis, vuoi din, keretlaččat!

Dát lea Hearrá sátni didjiide:

Kanaan, filistalaččaid eanan,

mun duššadan du

oktan buot ássiidatguin.

₆Riddu šaddá guohtuneanamin,

oapmegehččiid rássegieddin,

sávzzaid ja gáiccaid riddan.

₇Dat geat Juda sogas leat báhcán,

váldet rittu oapmineaset.

Doppe sii guođohit omiideaset,

ja eahkedis sii livvudit daid

Aškelona viesuide,

dasgo Hearrá, sin Ipmil, atná sis fuola,

son jorgala sin vuorbbi.

₈Mun gullen Moaba bilkádusa,

mo Ammon lea dan hiddjidan,

man jolgadit dat leat bilkidan mu álbmoga

ja bahkken sin eatnamii.

₉Dan dihte cealká Hearrá,

Almmiveagaid Ipmil, Israela Ipmil:

Nu duohta go mun ealán,

de Moabii geavvá dego Sodomai

ja ammonlaččaide nugo Gomorrai;

Sin eanan šaddá gáskálasbohttun,

sáltegohpin,

ávdimin agálaš áigái.

Dat geat mu álbmogis leat báhcán,

rievidit dan,

mu álbmoga bázahas váldá dan oapminis.

₁₀Ná geavvá daid álbmogiid čeavlli dihte,

danne go dat leat bilkidan

ja hiddjidan Hearrá,

Almmiveagaid Ipmila, álbmoga.

₁₁Hearrá surgeha daid, son jávkada

buot ipmiliid eatnama alde.

Gáiddus gáttiid álbmogatge

rohkadallet su, juohkehaš báikkistis.

₁₂Maiddái din, nubialaččat,

Hearrá miehkki goddá.

₁₃Hearrá lokte gieđa davi vuostá

ja billista Assyria,

son dahká Ninive ávdimin,

goikkisin dego sáttomeahcci.

₁₄Ealut livvadit gasku gávpoga,

Buotlágáš spiret goarjadit doppe.

Pelikána ja hoaššaháigir

idjadit geađgebázzegežiin.

Skuolfi njurgu láseráiggiin,

uksalasás ruŋká gáranas.

₁₅Dát lei dat ávvudeaddji gávpot

mii ásai oadjebassan

ja celkkii váimmustis:

“Ii oktage leat dego mun!”

Man ávdimin dat lea báhcán,

meahci spiriid goarjadanbáikin!

Buohkat geat mannet meaddel,

njurgejit ja čujuhit dan bilkidemiin.