Johannes 7

₁Taan maŋa Jeesus juuđij miätá Galilea. Juudeast sun ij halijdâm jotteeđ, ko juudaliih uccii máhđulâšvuođâ koddeđ suu.

₂Juudalij lostâkuátijuhle lâi alda. ₃Jeesus viiljah ettii sunjin: »Vyelgi Juudean, te tuu máttááttâspárnááh-uv uáinih, magarijd tavoid tun poorgah. ₄Ijhân kihheen čievâ tavoidis, jis sun áigu šoddâđ tobdosin. Jis tun kerd pastah tággáár tavvoid, te čääiti maailmân, kii tun lah!» ₅Uáináh viiljahkin iä oskom sunjin. ₆Jeesus eeđâi sijjân: »Tääl ij lah vala muu äigi – tijjân vuod suápá mii aaigijd peri. ₇Maailm ij pyevti vajediđ tii, mut muu tot vaijeed, tastko mun tuođâštâm, et ton tavoh láá paah. ₈Moonnâđ tij peri juhlijd. Mun jiem puáđi taan juuhlán, ko muu äigi ij lah vala puáttám.» ₉Näävt sun eeđâi já paasij Galilean.

₁₀Mut ko viiljah lijjii moonnâm juhlijd, meid Jeesus vuolgij toho, ij ulmui uáinidijn, mut syele. ₁₁Ko juhleh lijjii álgám, juudaliih uccii suu já koijâdellii: »Kost tot almai lii?» ₁₂Aalmug tigáštâlâi Jeesusist. Nubeh kijttâlii: »Sun lii šiev almai», nubeh ettii: »Eidu nubij kejij, sun lii aalmugtájutteijee.» ₁₃Kihheen ij kuittâg tuostâm sárnuđ sust almolávt, tastko puohah pollii juudalijn.

₁₄Ko juhleh lijjii jo pelimuddoost, Jeesus moonâi pajas temppâlân já máttáátškuođij. ₁₅Juudaliih omâttellii já ettii: »Maht tuot oppâmettum almai puáhtá tubdâđ čalluid?» ₁₆Jeesus eeđâi sijjân: »Tot, maid mun máttááttâm, ij lah muu oppâ, pic suu, kote lii muu vuolgâttâm. ₁₇Tot kote áigu nuávdittiđ suu táátu, puátá kale tubdâđ, puátá-uv muu máttááttâs Imelist vâi sáárnum-uv mun jieččân náál. ₁₈Tot, kote puáhtá oovdân jieijâs jurduid, haalijd kunnee olssis. Mut tot, kote haalijd kunnee jieijâs vuolgâtteijei, lii rehelâš, sust ij lah verivuotâ. ₁₉Ij-uvks Mooses adelâm tijjân laavâ? Ohtâgin tist ij kuittâg nuávdit tom. Mondiet tij viggâvetteđ koddeđ muu?»

₂₀Ulmuuh ettii: »Tust lii paas jieggâ. Kii tuu keččâličij koddeđ? ₂₁Jeesus västidij: »Mun toohim oovtâ áinoo tavo, já tom tij puohah imâštâlvetteđ. ₂₂Mooses asâttij tijjân pirrâčuoppâm – tot ij kale lah Moosesist vuálgám, pic madâreejijn – já tij pirrâčuopâdvetteđ meiddei sabattin. ₂₃Jis kerd olmooš pirrâčuopâduvvoo sabattin-uv, amas Mooses laavâ šoddâđ rikkođ, te mondiet tij leppeđ vaijaah tast, et mun sabattin pyeredim ubâ ulmuu? ₂₄Elleđ tuommii ton mield, magarin äšši olgoskulij oro, pic tuommiđ vuoigâlávt.»

₂₅Motomeh jerusalemliih ettii: »Ij-uv taat lah tot, kiäm sij halijdiččii koddeđ? ₂₆Maht sun uážžu sárnuđ tääbbin rijjâ iäge sij eeđâ maiden? Láá-uvsun haldâttâsalmaah tääl vissáseh tast, et sun lii Messias? ₂₇Taan almast mij kale tiettip, kost sun lii vuálgám. Ko Messias almostuvá, te kihheen ij tieđe, kost sun puátá.»

₂₈Ko Jeesus máttááttij temppâlist, sun čuárvui korrâ jienáin: »Tij tastoo tietivetteđ, kii mun lam já kost mun puáđám. Jiem mun lah puáttimstân jieš meridâm – muu vuolgâttij sun, kote lii tuotâvuotâ. Tij eppeđ suu tuubdâ, ₂₉mut mun tuubdâm suu, tastko mun puáđám suu kulen já tastko sun lii muu vuolgâttâm.» ₃₀Haldâttâsalmaah halijdii väldiđ suu kiddâ, mut kihheen ij kuittâg volliittâm suu, tastko suu puddâ ij lam vala puáttám. ₃₁Maaŋgah táváliih ulmuuh kuittâg uskuu sunjin. Sij ettii: »Ko Kristus puátá, toovâš-uv sungin eenâb tobdostavvoid ko taat lii jo toohâm?»

₃₂Ko fariseuseh kullii, et aalmug sáárnui Jeesusist tánávt, te sij já ollâpaapah vuolgâttii almaidis väldiđ suu kiddâ. ₃₃Jeesus eeđâi: »Uánihâš áigáá mun vala lam tii kulen. Talle mun moonâm suu kuuvl, kote lii vuolgâttâm muu. ₃₄Talle tij ucâvetteđ muu mut eppeđ kaavnâ, eppeđge tij peesâ toho, kost mun lam.»

₃₅Juudaliih koijâdellii kuoimijnis: »Kuus sun áigu moonnâđ? Kost mij ep suu kavnâččii? Lii-uv sun vyelgimin toi kuuvl, kiäh ääsih kreikkalij koskâvuođâst? Áigu-uv sun máttááttiđ kreikkalijd-uv? ₃₆Maid sun máhđulávt uáivildij ko sun eeđâi: ’Tij ucâvetteđ muu mut eppeđ kaavnâ’, já ’Tij eppeđ peesâ toho, kost mun lam’?

₃₇Juhle majemuu já stuárráámuu peeivi Jeesus čyežžilij sárnuđ já čuárvui: »Jis kiinii lii kuškâlum, puáđus muu kuuvl já juvos! ₃₈Kote osko munjin, ’suu siskiist kolgeh ellee čääsi virdeh’, tego čalluin iättoo.» ₃₉Tain Jeesus uáivildij Jiegâ, mon sunjin oskoo ulmuuh finniiččii maŋeláá. Vala ij Jieggâ lam puáttám, tastko Jeesus ij vala lamaš kirkesmuttum.

₄₀Ko motomeh olmoošjuávhust lijjii kuullâm Jeesus saanijd, sij ettii: »Taat ferttee leđe tot proofeet.» ₄₁Nubeh ettii: »Sun lii Messias.» Mut nubeh iäpádellii: »Ama Messias ij puáđi Galileast! ₄₂Čalluinhân iättoo, et Messias lii Taavvid maajeeldpuáttee já puátá Betlehemist, Taavvid päikkikaavpugist.» ₄₃Näävt ulmuuh tigáštâlškuottii sust. ₄₄Motomeh halijdii väldiđ suu kiddâ, mut kihheen ij kuittâg volliittâm suu.

₄₅Almaah, kiäh lijjii vuolgâttum väldiđ Jeesus kiddâ, maccii ollâpaapâi já fariseusij kuuvl, já taah koijâdii: »Mondiet tij eppeđ puáhtám suu?» ₄₆Almaah västidii: »Ohtâgin olmooš ij lah kuássin sárnum tego sun.» ₄₇Talle fariseuseh ettii: »Leppeđ-uv tij-uv adelâm čájádittiđ jieijâd? ₄₈Lii-uv kihheen haldâttâsalmaid oskom sunjin? Teikâ ohtâgin fariseus? ₄₉Tuot oppâmettum juávkku ij tieđe laavâst maiden – sij láá karodum puohah!» ₅₀Talle Nikodemus, kote jieš lâi fariseus já lâi ovdláhháá iällám teivâdmin Jeesusáin, eeđâi: ₅₁»Ijhân mii laavâ mield oovtâgin pyevti tuommiđ ovdilgo sun lii kuullum já lii valdum čielgâs, maid sun lii porgâm.» ₅₂Mut iärráseh ettii sunjin: »Tááiđáh jieš-uv leđe Galileast. Tuuđhâ čalluid, te oopah, et ij Galileast puáđi proofeet.»

[₅₃Puohah vuolgii páikkásis,